"İndiyə qədər Prezident seçkiləri zamanı Qarabağ və bitişik rayonlar işğalda olub" - Ziyafət Əsgərov

Milli Məclisin Müdafiə, təhlükəsizlik və korrupsiya ilə mübarizə komitəsinin sədri Ziyafət Əsgərova görə, növbədənkənar Prezident seçkiləri Azərbaycanın ərazi bütövlüyünün təsbiti deməkdir.

Sonxeber.az xəbər verir ki, bu barədə Ziyafət Əsgərov parlamentin dekabrın 8-də keçirilən plenar iclasında çıxışı zamanı deyib.

Komitə sədrinin sözlərinə görə, Konstitusiyanın 1 və 2-ci maddələrində göstərilib ki, hakimiyyətin mənbəyi və suverenliyin daşıyıcısı xalqdır.

"İş burasındadır ki, indiyə qədər Prezident seçkiləri zamanı Qarabağ və bitişik rayonlar işğalda olub. 1995-ci ildə ilk Konstitusiyamız qəbul ediləndə də belə idi. Düzdür, de-yure o ərazilər bizim idi. Amma indi ərazi bütövlüyümüz bərpa olunub. Konstitusiya xalq tərəfindən qəbul olunduğuna görə Prezidentin bütün ərazilərimizdə hakimiyyətinin tam bərqərar olması üçün xalqın iradəsi lazımdır. Burada nə isə şübhəli başqa məqam axtarmaq düşmənçilikdir", - Z.Əsgərov qeyd edib.

Telegramda izləyin