Yunanıstanın xarici işlər naziri Ermənistana səfər etməyi planlaşdırır

Yunanıstanın xarici işlər naziri Giorgos Gerapetritis yaxın vaxtlarda Ermənistana səfər etməyi planlaşdırdığını bildirib.

Sonxeber.az xəbər verir ki, Avropa İttifaqının Xarici Əlaqələr Şurası çərçivəsində Brüsseldə jurnalistlərə açıqlama verən Yunanıstan XİN rəhbəri bu gün erməni həmkarı Ararat Mirzoyanla görüşəcəyini bildirib.

"Biz bu gün xarici əlaqələr şurasına çətin və vacib bir gündəmlə gəlmişik. Biz Ermənistanla Avropa İttifaqı arasında münasibətlər məsələsindən başlayacağıq. Yunanıstan Cənubi Qafqazda davam edən sülh prosesini alqışlayır. Yunanıstanın səyləri sayəsində bu gün Ermənistan daha geniş regionda davamlı sülhə yönəlmiş mövqelərini təqdim etmək üçün Xarici Əlaqələr Şurasına dəvət olunub. Mən şəxsən Ermənistanın xarici işlər naziri ilə danışmışam və yaxın gələcəkdə Ermənistana səfər etmək niyyətindəyəm və həm Ermənistanın, həm də Azərbaycanın xarici işlər nazirləri ilə görüşmək şansım olacaq", - deyə Yunanıstan XİN rəhbəri bildirib.

Telegramda izləyin