"Əsirlərin mübadiləsini regionda sülhə doğru atılan ikinci addım kimi də qiymətləndirmək olar" - DEPUTAT

"Bu gün bütün dünya bir daha Azərbaycan dövlətinin gücünün şahidi oldu".

Bunu Sonxeber.az saytına danışan deputat Cavanşir Paşazadə bildirib.

Deputat vurğulayıb ki, Qazax rayonunda Azərbaycan Respublikası ilə Ermənistan Respublikası arasında hərbçilərin qarşılıqlı surətdə azad edilməsi prosesi baş tutub:

"Proses zamanı Ermənistan tərəfindən Azərbaycanın 2 hərbi qulluqçusu- Hüseyn Axundov və Aqşin Bəbirov da azad olundu. Hərbi qulluqçularımızın azad olunması hər bir azərbaycanlının böyük sevincinə səbəb oldu. Hər gün bizə möhtəşəm zəfərlər yaşadan Ali Baş Komandana təşəkkür edirəm. İnanıram ki, cənab prezident İlham Əliyevlə biz daha böyük zəfərlərin şahidi olacağıq".

Deputat vurğulayıb ki, əsirlərin mübadiləsini həm də humanizm dəyərlərini rəhbər tutaraq sülhü hədəfləyən xoşməramlı addım kimi də qiymətləndirmək olar:

"Əsirlərin mübadiləsini regionda sülhə doğru atılan ikinci addım da hesab etmək olar. Bilirsiniz ki, Ermənistan COP29-a ev sahibliyinə öz namizədliyini geri götürərək, Azərbaycanın namizədliyini dəstəklədi. Azərbaycan isə Ermənistanın Şərqi Avropa Qrupundan COP-un Büro üzvlüyünə namizədliyinə dəstək vermişdi. Bütün atılan xoşməramlı bu addımlar bizdə tezliklə Azərbaycan-Ermənistan arasında gözlənilən sülh müqaviləsinin də imzalanacağı inamını artırdı".

Telegramda izləyin