"Xurşidbanu Natəvanın heykəlinə qarşı edilən hörmətsizlik Fransanın ölkəmizə qarşı növbəti təxribatıdır" - DEPUTAT

"Fransanın məkrli və təxribat xarakterli addımları qəbuledilməzdir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Fransada Azərbaycan parkında yazılar silinib, Xurşidbanu Natəvanın heykəlinə qarşı təhqiramiz addımlar atılıb:

"Xurşidbanu Natəvanın heykəlinə qarşı edilən hörmətsizlik Fransanın ölkəmizə qarşı növbəti təxribatıdır. Dünyada mədəni irsin qorunmasına cavabdeh olan və UNESCO-ya ev sahibliyi edən Fransanın bu cür addım atması bu ölkənin necə barbar dövlət olduğunu sübut edir. Bu gün insan hüquqlarından, mədəni irslə bağlı Azərbaycana və digər ölkələrə dərs keçəcək axırıncı ölkə Fransadır. Fransa hələ də Azərbaycanın öz ərazilərini erməni işğalından azad etməsini həzm edə bilmir. 30 il ərzində Fransa bizə qarşı heç vaxt ədalətli mövqe tutmadı. Bütün dünya şahiddir ki, Ermənistan 30 il işğal altında saxladığı Azərbaycan torpaqlarında hansı vandalizmi törədib. Bu illər ərzində bir dəfə də olsun Fransa Ermənistandan işğalçı siyasətə son qoymağa və BMT Təhlükəsizlik Şurasının müvafiq qətnamələrini icra etməyi tələb etmədi. Əksinə, gizlin şəkildə Ermənistanı dəstəkləyərək status-kvonun qorunub saxlanması üçün əlindən gələni əsirgəmədi. 44 günlük Vətən müharibəsində və ondan sonrakı dövrdə Fransa gerçək simasını nümayiş etdirərək açıq-aşkar işğalçı Ermənistana dəstək verməkdədir. Atdığı təxribatçı addımları ilə Fransa bir daha Cənubi Qafqazda sülh prosesində vasitəçi ola bilməyəcəyini sübut etdi".

Deputat vurğulayıb ki, hazırda Fransa Ermənistanı növbəti təxribatlara təhrik edir və revanşist qüvvələrə dəstək verir:

"Regionda sülhün təmin olunmasına əngəl törədənlərdən biri də Fransadır. Fransa səfirliyinin iki əməkdaşının diplomatik statuslarına uyğun olmayan və "Diplomatik əlaqələr haqqında" 1961-ci il Vyana Konvensiyası ilə ziddiyyət təşkil edən fəaliyyətinə görə Azərbaycan hökuməti tərəfindən "persona-non-grata" (arzuolunmaz şəxs) elan olunub və həmin şəxslərin 48 saat ərzində Azərbaycan ərazisini tərk etməsi tələb edilib. Fransa regionda sülhün təmin olunmasına əngəl törədən addımlarını davam edərsə Azərbaycan bu ölkə ilə münasibətlərinə yenidən baxmalı olacaq".

Telegramda izləyin