2023-cü ilin ən yadda qalan HADİSƏLƏRİ! - FOTOLAR

Yola salmağa hazırlaşdığımız 2023-ci il Azərbaycanın xarici və daxili siyasəti üçün bir sıra mühüm hadisələrlə yadda qaldı. Bu hadisələr dünyanın yeni düzənininə yön verən hadisələr oldu. Sonxeber.az 2023-ci ildə bölgələrdə baş verən həmin hadisələrin xronologiyasını təqdim edir:

İlk olaraq yanvarın 27-də Azərbaycanın İrandakı səfirliyində terror aktı törədilib. Kalaşnikov avtomatı ilə silahlanmış şəxs Azərbaycan səfirliyinin binasına soxularaq Təhlükəsizlik Xidmətinin rəisini öldürüb, iki nəfəri yaralayıb. Terrorçu səfirliyin digər təhlükəsizlik əməkdaşı tərəfindən zərərsizləşdirilib. Bundan sonra Azərbaycanın İrandakı səfirliyinin əməkdaşları təxliyə edilib.

Mart ayında tanınmış ilahiyyatçı, Məşədi Dadaş Məscidinin imamı Hacı Şahin Həsənli dünyasını dəyişib. Səhər 5 radələrində Yasamal rayonunda yerləşən evində ürəktutmadan vəfat edib. 48 yaşlı Hacı Şahin Həsənli, həmçinin Qafqaz Müsəlmanları İdarəsinin (QMİ) səlahiyyətli nümayəndəsi idi. Qeyd edək ki, din xadimi son mənzilə yola salınarkən "Qurd qapısı" qəbiristanlığına minlərlə adam axın edib.

Mart ayında millət vəkili Fazil Mustafa sui-qəsdə məruz qalaraq evinin önündə güllələnib. Evinin qarşısında silahlı hücuma məruz qalan millət vəkilinə bir neçə dəfə atəş açılıb. O, bu zaman iki güllə yarası alıb.

Avqust ayında sosial şəbəkələrdə "Nikosayağı" adı ilə tanınan bloger Nicat Şakirli qəzaya düşüb. N. Şakirli idarə etdiyi "Porsche" markalı avtomobili ilə TIR-a çırpılıb. Qəza nəticəsində bloger və avtomobildə olan sərnişinlər ağır bədən xəsarətləri alaraq xəstəxanaya aparılıblar. Nəticədə qolu amputasiya olunub.

Sentyabrın 19-da Füzuli və Xocavənd rayonlarındakı erməni təxribatı nəticəsində 7 polis əməkdaşı həlak olub, daha 6-sı yaralanıb. Eyni zamanda törədilmiş terror aktı nəticəsində DİN-in əməkdaşları olan 05.02.1994-cü il təvəllüdlü Camalzadə Asim Knyaz oğlu, 08.07.1987-ci təvəllüdlü Şirinov Ramil Arif oğlu, 12.07.1991-ci il təvəllüdlü Mahmudov Seymur Elsevər oğlu və 21.07.1998-ci il təvəllüdlü Zamanov Xəzər Azər oğlu hadisə yerində həlak olublar. Sentyabrın 19-da saat 01 radələrində Füzuli rayonu ərazisində baş verən yol qəzasında isə polis əməkdaşları Ələsgər Əsgərov, Elşən Həsənov, Seyfi Abdullayev həlak olublar.

Həmin gün üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması məqsədilə məqsədilə bölgədə lokal xarakterli antiterror tədbirləri həyata keçirilib. Azərbaycanın Qarabağ bölgəsində yerləşən Ermənistan silahlı qüvvələrinin birləşmələri silahı yerə qoyub və təslim olublar. Nəticədə Xankəndi və ərtaf ərazilər nəzarətimizə keçdi.
Bununla yanaşı senytabr ayında "Dağlıq Qarabağ Respublikasının dövlət naziri" vəzifəsində çalışmış 55 yaşlı Ruben Karleni Vardanyan Azərbaycandan Ermənistan istiqamətində hərəkət edərkən saxlanılıb. Azərbaycan Dövlət Təhlükəsizliyi Xidmətinin (DTX) əməkdaşları Qarabağda separatçıların keçmiş "prezidenti" Araik Arutyunyanı saxlayıblar. Qarabağdakı qondarma rejimin keçmiş "prezident"ləri Arkadi Qukasyan və Bako Saakyan, eləcə də "Daşnaksütyun" partiyasının "Qarabağ təmsilçisi" və separatçı rejimin keçmiş "parlament sədri" David İşxanyan törətdikləri cinayət əməllərinə görə barələrində aparılan cinayət işləri üzrə Dövlət Təhlükəsizliyi Xidməti tərəfindən saxlanılaraq Bakıya gətirilib.

Sentyabrda Millət vəkili Qənirə Paşayeva vəfat edib. Naməlum mənşəli hipotonik vəziyyət diaqnozu qoyulan Qənirə Paşayevanın səhhətindəki kritik durumla əlaqədar Mərkəzi Klinikanın həkim personalı və Türkiyədən cəlb edilmiş həkim mütəxəssislər tərəfindən görülmüş bütün zəruri tədbirlərə baxmayaraq millət vəkilinin həyatını xilas etmək mümkün olmayıb.
15 oktyabr Prezident İlham Əliyev Xankəndinin mərkəzi meydanında üçrəngli bayrağımızı qaldırdı. Prezident eyni gündə Xocalı rayonunun Əsgəran qəsəbəsində də bayrağımızı ucaldıb, bu il sentyabrın 20-də separatçılardan azad edilən Əsgəran qalasında olub. Prezident o cümlədən 2020-ci ilin oktyabrında işğaldan azad edilən Tərtər rayonunun Suqovuşan qəsəbəsində istirahət parkının açılışında iştirak edib. Suqovuşan su anbarı təmir-bərpadan sonra istifadəyə verilib.

7 dekabrda Azərbaycan Respublikasının Prezidenti İlham Əliyev növbədənkənar prezident seçkilərinin keçirilməsi barədə sərəncam imzalayıb. Sərəncamda deyilir: "Azərbaycan Respublikasının Mərkəzi Seçki Komissiyası növbədənkənar Azərbaycan Respublikası Prezidenti seçkilərinin 2024-cü il fevralın 7-nə təyin olunmasını və Azərbaycan Respublikasının Seçki Məcəlləsində müəyyən edilmiş qaydada keçirilməsini təmin etsin".

13 dekabrda Qazax-İcevan sərhədində (Bala Cəfərli kəndində) Azərbaycanla Ermənistan arasında əldə edilmiş razılaşmaya əsasən, saxlanılmış hərbçilərin mübadiləsi baş tutub. Əldə olunan razılaşmalar nəticəsində Hüseyn Axundov və Aqşin Bəbirov azad olunublar.
21 dekabrda işğaldan azad olunan Xankəndi şəhərində tarixi futbol oyunu keçirildi. İşğaldan azad olunmuş ərazimizdə 30 ildən sonra ilk futbol oyununun sevincini yaşadıq. Biz Xankəndidə təkcə oyun deyil, həm də böyük bayram əhval ruhiyyəsinin şahidi olduq.
Sevda Səfərova

Telegramda izləyin