"Övladlarını 12-13 yaşında evləndirmək istəyən valideynlər həbs edilməlidir" - AÇIQLAMA

Xəbər verdiyimiz kimi Sabirabadın Məmişli kəndində 12 yaşlı qız özündən 20 yaş böyük kişi ilə nişanlandırılıb.

Bununla bağlı Sonxeber.az-a danışan deputat Cavanşir Paşazadə bildirib ki, övladlarını 12-13 nikaha məcbur edən valideynlər həbs edilməlidir:

"12 yaşlı qıza ər yox, təhsil lazımdır. Bu məsələdə qızın təhsil aldığı məktəb və həmin rayonun səlahiyyətli qurumları günahkardır. Təəssüf ki, nə qədər maarifləndirmə işləri aparılsa da erkən nikahların sayı artmaqdadır. Bəzi valideynlər sanki övladlarından canlarını qurtarmaq üçün tez-tələsik evləndirirlər. Bir müddət sonra da qız boşananda deyirlər ki, biz səni qəbul etmirik. Ümumiyyətlə qızlarını və oğlanlarını erkən nikaha məcbur edən valideynlərlə bağlı qanun sərtləşdirilməldir. Bu cür valideynlərin bir-ikisi həbs olunsa digərlərinə də dərs olar".

Deputat qeyd edib ki, qızlarını erkən nikaha məcbur edən ataları başa düşə bilmirəm:

"Hər bir qız uşağı atasının baş tacıdır. Belə hallar məni çox məyus edir. Hesab edirəm ki, ölkəmizdə erkən nikahların qarşısını almaq üçün qanunların sərtləşdirilməsi mütləqdir. Həmçinin bu məsələdə insanlarımızın duyarlı olması vacibdir. Televiziyalarda erkən nikahın fəsadları ilə bağlı maarifləndirici verlişlər hazırlanmalı və birgə erkən nikahla mübarizə aparımalıdır. Heç kəsin kiminsə həyatına məhv etməyə haqqı yoxdur. Hətta valideynlərin belə".

Telegramda izləyin