Bu sürücülər CƏRİMƏLƏNƏ BİLƏR

Sürücülərin yerli-yersiz səs siqnalından istifadə etmələri, adətən bir-birilərinə siqnalla cavab vermələri hər zaman aktual müzakirə mövzusudur. Təklif edilir ki, belə halların qarşısını almaq məqsədilə Dövlət Yol Polisi tərəfindən həmin sürücülərlə bağlı tədbir görülsün, nəzarət gücləndirilsin.

Nəqliyyat məsələləri üzrə ekspert Elməddin Muradlı Pravda.az-a açıqlamasında deyib ki, səs siqnallarından istifadə "Yol hərəkəti haqqında" qanunla müəyyənləşdirilmiş qaydalardan biridir:

"Səs siqnallarından yalnız şəhər daxilində, yaşayış məntəqələrində yol nəqliyyat hadisəsinin baş verməsinin qarşısını almaq üçün istifadə oluna bilər. Bəzən qarşıdan gələn maşın sizin yolunuza çıxır, yaxud yol ayrıcında sizə yol vermir və ya piyada fikirlidir, üzü əks istiqamətə baxa-baxa sizə doğru gəlir, özünü maşının qabağına atır... Bu kimi hallarda xəbərdarlıq məqsədilə siqnaldan istifadə etmək olar. Yaşayış məntəqələrindən kənarda isə yalnız ötmə əməliyyatı aparılan zaman qarşıdakı nəqliyyat vasitələrini xəbərdar etmək üçün səs və işıq siqnalından istifadə icazəlidir. Digər hallarda siqnal vermək qadağandır və buna görə 30 manat cərimə tətbiq edilir. Sadəcə, siqnal verən sürücünü aşkar etmək çətindir. Yəni siz hansısa "X" maşını saxlayırsınız, o maşının sürücüsü isə deyir ki, siqnal verən mən deyildim. Sübut etmək çətindir, problem budur..."

Telegramda izləyin