6 yaşına qədər olan uşaqların "yemək pulu"nu dövlət qarşılaya bilər?- AÇIQLAMA

Uşaq pulu məsələsi zaman-zaman gündəmə gəlir. Eyni zamanda Azərbaycanda elə ailələr var ki,övladlarını lazımi qida ilə təmin edə bilmirlər. Bəs sosial təminatı aşağı olan ailələrdə yaşayan 6 yaşına qədər uşaqların "yemək pulu"nu dövlət qarşılaya bilərmi?

Məsələ ilə bağlı Milli Məclisin deputatı Müşfiq Cəfərov Sonxeber.az-a açıqlama verib.

Deputat son illər sosial təminat sahəsində ciddi islahatlar aparıldığını bildirib:

"Son zamanlar mediyaya ehtiyac sahibi ailələrin müraciəti çoxalır. İnsanlar düşünür ki, bu onların probleminin çıxış yoludur. Lakin nəticə etibarilə 1-2 gün mediada görünəndən sonra bu şəxslər unudulub gedir. Onlara isə bu problemin çıxış yolu göstərilmir. Dövlət ehtiyac meyarlarının müəyyənləşdirilməsini günbəgün asanlaşdırır ki, sosial müdafiəyə ehtiyacı olan şəxslər bundan faydalansın.

Son illər sosial təminat sahəsində ciddi islahatlar aparılıb, artıq vətəndaşlar onlayn şəkildə sosial yardımdan faydalanmaq üçün dövlət qurumlarına müraciət ünvanlaya bilirlər".

Müşfiq Cəfərov vətəndaş qəbulu zamanı rastlaşdığı problemlərdən danışıb:

"Artıq sosial yardımdan faydalana bilmək üçün müəyyənləşdirilən meyarlar da sadələşdirilib. Amma mən öz vətəndaş qəbulu zamanı rastlaşdığım problemi xüsusi qeyd etmək istəyirəm. Bəzən vətəndaş müraciət edir ki, mən dövlətin sosial təminat proqramına müraciət edirəm, lakin mənə mənfi cavab gəlir, araşdırdıqda müxtəlif səbəblərlə qarşılaşırıq. Vətəndaş kiminsə istifadə etdiyi maşını öz adına qeydiyyatda saxlayır, amma bu onun deyil, lakin aidiyyatı qurumun sistemində vətəndaşın ehtiyac meyarlarına uyğun olmadığı görünür. Eyni zamanda ailənin tərkib hissəsinin hərəsi bir evdə qeydiyyatdadır. Sənədlərin düzgün olmaması sosial yardıma müraciət edənlərin mənfi cavabla rastlaşmasına səbəb olur. Digər tərəfdən də vətəndaşlar arasında ehtiyacı olmadığı halda bu yardımdan faydalanmağa çalışanlar da var. Bu da əsl ehtiyac sahiblərinin sosial təminatının reallaşmasına mane olur".

Gülcahan Məmmədova

Telegramda izləyin