Hərbçilərin istefaya göndərilməsinin səbəbi nə ilə bağlıdır? - AÇIQLAMA

Xəbər verdiyimiz kimi, "Hərbi xidmətkeçmə haqqında" Əsasnamənin müvafiq bəndinə əsasən, həqiqi hərbi xidmətdə olmağın son yaş həddinə çatmış Azərbaycan Ordusunun bir neçə vəzifəli şəxsi ehtiyata və istefaya göndərilib. Hərbçilərin istefaya göndərilməsinin səbəbi nə ilə bağlıdır.

Məsələ ilə hərbi ekspert Elxan Şıxəliyev Sonxeber.az-a açıqlama verib:

"Strateji səviyyədə vəzifə tutan şəxslərin təyinatını müdafiə nazirinin təqdimatına əsasən Ali Baş Komandan həyata keçirir. Rotasiyaların həyata keçirilməsi və yerdəyişmələrin, operativ-strateji vəzifə tutan müdafiə nazirlərinin quruluş və komandanlığının, birlik komandirlərinin təyinatı planlıda həyata keçirilə bilər. Bu indiki mərhələdə yüksək vəzifə tutan zabitlərin kənarlaşdırılması rotasiya qaydasında baş tutan məsələdir. Adətən komandanlar, birlik komandirləri, müdafiə nazirinin müavinləri plan üzrə dəyişdirilə bilirlər. Düşünürəm ki, təyinatlarda uğurlu təyinatlardır. Xüsusilə quru qoşunları komandanına xüsusi təyinatlı qüvvələrin komandanının təyin olunması silahlı qüvvələrinin quru qoşunlarında xidmət edən heyətlərin döyüş hazırlığını yüksək səviyyəyə qaldıracaq".

Ekspert bildirib ki, Vətən müharibəsi qəhrəmanı general-leytenant Hikmət Mirzəyevin zabitlik və generallıq xüsusiyyətlərini Azərbaycanda bilməyən şəxs yoxdur:

"Xüsusilə quru qoşunları komandanlığına təyinatı çox uğurlu təyinatdır. Çünki avtomatik olaraq həmin şəxs müdafiə nazirinin müavini statusuna malik olur. Digər vəzifələrindən təxris olunanlar isə yaş həddinin bitməsinə görə ehtiyata buraxıblar. Bu da normal haldır. Gənc nəsil zabit heyəti yetişir. Ən azından operativ-strateji səviyyədə 30-35 il xidmət keçmiş zabitlərin ehtiyata buraxılmasıda normal hesab olunmalıdır. Çünki yaş və xidmət həddinin bitməsindən sonrakı mərhələdə onların yenilənməsi, yeni zabit kadrların yetişdirilməsi və yerini tutması həyata keçirilməlidir. Hesab edirəm ki, yeni təyinatlarımız uğurlu olacaq. Çünki 44 günlük müharibə və antiterror tədbirlərində kifayət qədər həm müharibə , həm də hərbi xidmət təcrübəsi olan zabit və generallarımız var".

Elxan Şıxəliyevin sözlərinə görə, vəzifədən çıxarılanlar Azərbaycan Silahlı Qüvvələrinə ən azından 30-35 il xidmət vermiş şəxslərdir:

"Yaşları təxris müddəti həddinə çatıblar. Həm də hərbi xidmət keçmənin 20 illik müddətini doldurmuş şəxslərdir. Bu məsələnin sırf, hər hansı bir səbəb üzərindən həyata keçirilməsini qiymətləndirilməsi doğru olmazdı. Həqiqətən generallar və zabitlər hər hansı bir səbəbdən vəzifədən çıxarılması məsələsi olsaydı, onlara cinayət işi qaldırılmalı və xidmət zamanı buraxdığı səhvlərə görə xüsusi qaydada araşdırmalar təyin olunmalı idi. Bunu ictimaiyyətdə bilməli idi. Ona görə biz artıq bundan sonra Türkiyə-Azərbaycan silahlı qüvvələrini Türkiyənin mini modelinə keçidi üzərindən artıq belə rotasiyaların xüsusən də yeni vəzifələrə yeni təyinatların olacağını tez-tez gözləməliyik. Buna kadr potensialımız da imkan verir. Hərbi vəzifələrdə yeni çağırışlar yaranıb. Xüsusən komandanlar, müdafiə nazirinin müavinləri, birlik komandirlərinə kimlərin təyin olunması çox önəm kəsb edir".

Xatırladaq ki, Xüsusi Təyinatlı Qüvvələrin komandanı, general-leytenant Hikmət Mirzəyev müdafiə nazirinin müavini - Quru Qoşunlarının komandanı təyin edilib.

Sevda Səfərova

Telegramda izləyin