Xaricdə təhsil alan tələbələrin "yol pulu" dövlət tərəfindən qarşılana bilər? - AÇIQLAMA

"Xaricdə yaşayan tələbələr ilə bağlı təkcə "yol pulu" ehtiyacının qarşılanmasında deyil, digər məsələlərdə də stimullaşdırıcı addımlar atılmalıdır. Xaricdə yaşayan, təhsil alan tələbələrimiz bir neçə qrupa bölünür. Dövlət proqramları əsasında xaricdə oxuyan və fərdi, öz imkanları və istəkləri əsasında xaricdə təhsili seçən tələbələrimiz var. Dövlət proqramı əsasında xaricdə oxuyan tələbələrimiz ilə bağlı əlavə güzəştlərin edilməsinə ehtiyac vardır. Dövlət proqramı əsasında xaricdə oxuyan tələblərimizə dövlət hesabından xeyli yardımlar edilir. Onların yaşayışı, ev və təhsil xərcləri hər bir şey dövlət tərəfindən qarşılanır. Təbii ki, onlarda bunun qarşılığında dövlətdə işləməlidirlər".

Bu sözləri Sonxeber.az-a açıqlamasında təhsil məsələləri üzrə ekspert Elmin Nuri deyib. Elmin Nuri bildirib kİ, müəyyən bir güzəştlər paketinin hazırlanmasına düşünürəm ki, ehtiyac vardır:

" İnanıram ki dövlət bunu edəcəkdir. Söhbət burada dövlət proqramı əsasında xaricdə təhsil alan gənclərdən gedir. O ki qaldı öz hesabına xaricdə təhsili seçən və əsasən Türkiyə, Rusiya, Ukrayna və Gürcüstan universitetlərini seçən gənclərin sayı minlərlədir. Hətta deyərdim ki, on minlərlədir. Təkcə qardaş Türkiyədə oxuyan tələbələrimizin sayı 10 minə qədərdir. Onlar ilə bağlı yol pulu və müəyyən yaşayış xərcləri istiqamətində zəruri addımların atılması təbii ki, yaxşı olardı".

Ekspertin sözlərinə görə, dünyanın heç bir ölkəsində bu cür təcrübə yoxdur. Belə bir təcrübə mövcuddur. Dövlət proqramı əsasında, dövlətin öz göndərdiyi tələbəyə yardım və güzəşt etmə təcrübəsi var:

"Özü öz fərdi imkanları hesabına xaricdə təhsili seçən şəxslər üçün belə imkanlar yoxdur. Azərbaycan inkişaf etməkdə olan ölkələrdəndir. Bizim bu istiqamətdə güzəştlər etməyimiz doğru olmazdı. Niyə görə? Onsuzda öz fərdi imkanı hesabına xaricdə oxumağı seçən tələbə və onun ailəsi müəyyən bir hesablamalar aparır. Onlar yaşam xərclərində hesablayırlar. Yol və başqa xərclərdə ailə tərəfindən nəzərə alınır. Amma heç olmasa bir istiqamətdə yol pulunun dövlət tərəfindən qarşılanması istiqamətində addımın atılması yaxşı olardı. 50 faizdə güzəşt olunsa bu yaxşı göstəricidir. Qarşıda Novruz bayramı gəlir. Təbii ki, Novruzda tələbələr evlərinə gələcək. Yaxud yay tətilində evlərinə gəlmək istəyən tələbələr var. Onların təyyarə biletlərində 50 faiz endirim olması düşünürəm ki, yaxşı olardı. Bununla bizim maliyyə itkilərimiz o qədər böyük olmayacaq. Əksinə indinin tələbəsinə, gələcəyin kadrına böyük stimul vermiş olarıq".

Sevda Səfərova

Telegramda izləyin