""ASALA"nın ölkəmizə qarşı törədəcəyi hər hansı təxribat Ermənistanın sonu ola bilər" - DEPUTAT

Ermənistanda "proksi qüvvələrin" – "ASALA" və digər terror təşkilatların Azərbaycana qarşı müharibəyə cəlb edilməsi təklifləri irəli sürülüb.

Bununla bağlı Sonxeber.az-a danışan deputat Cavanşir Paşazadə bildirib ki, "ASALA" terror təşkilatı 1975-ci ildə Yevgeni Primakov tərəfindən yaradılıb:

"Guya ki, "ASALA" ermənilərin milli azadlıq ordusudur. Bu terror təşkilatı Suriyada yaradılıb. Bu gün "ASALA" Yaxın Şərqdəki bütün terror qruplaşmaları ilə əməkdaşlıq edir. Ən çox da PKK ilə birgə çalışır. "ASALA" 70-80-ci illərində xarici ölkələrdə Türkiyə dipomatlarına qarşı terror aktları törətməsi ilə tanınıb.

Bu gün "ASALA"-nın fəaliyyətinin sərbəst şəkildə davam etdiyi ölkələrdən biri də Fransadır. Bu gün Fransanın ölkəmizə qarşı mövqeyi göz önündədir. Hesab edirəm ki, Azərbaycanın Fransadakı səfirliyində təhlükəsizlik tədbirləri artırılmalıdır. Tək Fransada deyil, Azərbaycanın xaricdə olan bütün səfirliklərinin, konsulluqlarının mühafizəsi gücləndirilməlidir".

Deputat qeyd edib ki, "ASALA"nın ölkəmizə qarşı törədəcəyi hər hansı təxribat Ermənistanın sonu ola bilər

""ASALA"nın Azərbaycanı təhdid etməsi bir daha onu göstərir ki, Ermənistanda terror dövlət siyasəti səviyyəsinə qaldırılmışdır və dövlət terrorçuları dəstəkləyir. Ermənistanın beynəlxalq fəaliyyətinin əsas istiqamətləri terror və təhdiddir. Görünür, hələ də Ermənistan səhvlərindən nəticə çıxarmaq istəmir. Havadarlarının sifarişi ilə regionda vəziyyəti yenidən gərginləşdirməyə çalışır. Ermənistanın və havadarlarının bu planı da digərləri kimi puç olacaq".

Telegramda izləyin