Mebel sexindəki partlayışa görə səbəbkarları 10 ilə yaxın HƏBS GÖZLƏYİR- AÇIQLAMA

Xəbər verdiyimiz kimi, Bakıda mebel sexindəki partlayışda 3 nəfər ölüb, 24 nəfər xəsarət alıb. Faktla bağlı Cinayət Məcəlləsinin 225.3 (yanğın təhlükəsizliyi qaydalarını pozma - ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq - ehtiyatsızlıqdan iki və daha çox şəxsin ölümünə səbəb olduqda) maddələri ilə cinayət işi başlanaraq, Baş prokurorun müvafiq qərarına əsasən prokurorluq və Fövqəladə Hallar Nazirliyinin peşəkar müstəntiqlərindən ibarət birgə istintaq qrupu yaradılıb, istintaqın aparılması Baş Prokurorluğun Kriminalistika və informasiya texnologiyaları idarəsinə həvalə olunub.

Məsələ ilə bağlı hüquqşünas Ələsgər Məmmədli Sonxeber.az-a açıqlama verib.

Hüquqşünas maddələrə aydınlıq gətirib:

"Bu çox üzücü hadisədir. Son zamanlar baş verən bu yanğınlar, onu göstərir ki, bu istiqamətdə nəzarət zəifdir. Burada FHN-nin yanğından mühafizə xidmətinə də xeyli məsuliyyət düşür. Önləyici tədbirlərdə,bu tip müəssisələrdə, yanğın təhlükəsi yüksək olan sanayə və istehsalat sahələrində daha diqqətli olmaq lazımdır. Burada sadəcə qurumun rəhbərliyi məsuliyyət daşımır. Eyni zamanda bu prosesə nəzarət edən, onlara lisenziya verən və ora nəzarət həyata keçirən qurumların da müəyyən məsuliyyəti ola bilər. İstintaq daha dərindən araşdırılıb məsuliyyətə cəlb olunmalıdır. Bundan sonra oxşar hadisələr baş verməməsi üçün önləyici tədbirlər görülməlidir.

Baş Prokurorluğun yaydığı məlumata görə hadisə ilə bağlı iki maddə- Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələrilə cinayət işi açılıb. 225.3 maddəyə əsasən, 5 ildən - 10 ilə qədər həbs cəzası nəzərdə tutulub.

314.3-cü - Səhlənkarlıq maddəsinə əsasən, vəzifəli şəxsin işə vicdansız, laqeyd münasibəti və öz xidməti vəzifəsini yerinə yetirməməsi üçün 3 ildən - 7 ilə qədər azadlıqdan məhrum etmə cəzası nəzərdə tutulub".

Gülcahan Məmmədova

Telegramda izləyin