Azərbaycan 4 günlük iş rejiminə keçə bilər? - AÇIQLAMA

İş həftəsinin 4 günə endirilməsi Avropadan ABŞ və Asiyaya qədər bir çox ölkənin gündəmindədir. 4 günlük iş rejimi rəqəmsallaşma və qloballaşma ilə səciyyələnən yeni nizamda isçilərə şərait yaradan bir çox üstünlüklər təqdim edir. Bu yeni konsepsiya o cümlədən vaxtın səmərəli keçməsinə xidmət edir. Bəs Azərbaycanda 4 günlük iş rejimi tətbiq edilə bilər?

Məsələ ilə bağlı, Milli Məclisin deputatı Müşfiq Cəfərov Sonxeber.az-a açıqlamasında bildirib ki, Avropa ölkələrinin bəzilərində 4 günlük iş sistemi mexanizmi tanınsa da, insanlar bu yeniliklə elə də razılaşmırlar:

"Əslində hələ tam şəkildə 4 günlük iş qrafiki tətbiq olunan ölkə yoxdu. Beləki, işçilər və işəgötürənlə razılaşdıqları təqdirdə iş həftəsini 5 gün əvəzinə 4 gündə tamamlaya bilərlər. Bu fürsətdən yararlana bilənlər həftə sonu 3 günlük məzuniyyət götürə və ya həftə ərzində əlavə 1 günlük məzuniyyətdən istifadə edə bilərlər. Hazırda dünyada yeni olan bu iş qrafiki demək olarki, heç 1 faiz işçini belə əhatə etmir. Bir sözlə bu tətbiq gözlənildiyi kimi rəğbətlə qarşılanmadı. Mən deyərdim ki, əslində burada məqsəd hamının 4 gün işləmək məcburiyyətində qalmasını təmin etmək deyil, bunu bir seçim kimi təklif etməkdir. Yəni bu praktika işçilərin və işəgötürənlərin öz ixtiyarındadır".

Deputat düşünür ki, hazırda Azərbaycan əmək bazarı üçün 4 günlük iş rejiminin tətbiq edilməsindən çox əmək bazarında vacib bir sıra islahatların keçirilməsi daha vacibdir:

"Azərbaycan əmək bazarında işçilərin tam olaraq rəsmi əmək müqaviləsi ilə çalışması, əmək müqavilələrində ödənilən əmək haqqı məbləğlərinin tam göstərilməsi kimi vacib məsələlər mövcuddur. 4 günlük iş rejiminə keçid iş sahələrinin xarakterindən asılı olaraq, əmək məhsulldarlığına müxtəlif cür təsir edəcəkdir.Bu səbəbdən müəyyən sahələrdə özünü doğrultsa da, bir çox vacib sahədə məhsuldarlığa əks təsir edə bilər".

Sevda Səfərova

Telegramda izləyin