Prezident seçkilərindən sonra hansı dövlət qurumları birləşdirilə bilər? - AÇIQLAMA

Bu gün aktual mövzulardan biri növbədənkənar prezident seçkilərindən sonra keçiriləcək islahatlardır. Bəs prezident seçkilərindən sonra, Azərbaycanda hansı dövlət qurumları birləşdirilə bilər?

Məsələ ilə bağlı politoloq Kazım Kazımov Sonxeber.az-a açıqlamasında bildirib ki, Azərbaycan artıq tarixi bir dövr yaşayır. Həm İkinci Qarabağ müharibəsi, həm də senytabr ayında keçirilən lokal antiterror tədbirlərindən sonra Azərbaycan dövlət müstəqilliyi tarixində və 1918-ci ildən bəri mövzuda olan problemi tamamilə aradan qaldırdı:

"Bu problem Azərbaycan hakimiyyəti, Azərbaycan ordusu və xalqının birliyi nəticəsində həll edildi. Digər tərəfdən cənab prezidentin son çıxışlarına baxdığımızda və o cümlədən yerli media orqanlarına verdiyi son müsahibəsinə baxdığımızda cənab prezident açıq şəkildə ifadə etmişdir ki, 7 fevraldan sonra Azərbaycanda yeni bir era başlayır. Bugünkü rəqəmlərə baxdığımızda çox asanlıqla deyə bilərik ki, 7 fevralda cənab prezidentin təkrar qalib gələcəyini görürəm. Onun üçün də Azərbaycanda "Qalıb lider, qalib xalq" şüarı altında bir çox struktur islahatlarının həyata keçiriləcəyini gözləyirəm. Bu struktur islahatlarını indidən tam şəkildə dəqiq demək çətin olar. Lakin onu deyə bilərəm ki, böyük ehtimalla bir çox nazirliklər və bir çox dövlət qurumları birləşdiriləcək".

Politoloqun sözlərinə görə, icra hakimiyyəti strukturunda da ciddi dəyişikliklər gözləyə bilərik:

"Müasir dünyada artıq həm texnologiyaların inkişafı, həm də daha sadə dövlət modelinin inkişafı nəticəsində dövlət büdcəsindən yükü azaltmaq üçün artıq bir çox dövlət qurumları birləşdirilir. O cümlədən Azərbaycanda biz bilirik ki, son illərdə bu istiqamətdə addımlar atılıb. 7 fevraldan sonra ciddi struktur dəyişikliklərinə gediləcəkdir. Bu reformlar Azərbaycan dövlətçiliyi adına önəmlidir. Nə qədər sadələşdirilmiş və nə qədər strukturu güclü olan dövlət qurumları olarsa, Azərbaycanın yeni arasında bu qurumların fəaliyyəti daha mütərəqqi şəkildə olacaqdır. Nazirliklərin və dövlət qurumlarının birləşdirilməsi ilə birlikdə, yeni dövlət agentliklərinin qurulması da gözləniləndir. Bu gün Azərbaycanda artıq iqtisadi rayonlar var. İqtisadi rayonlar üzrə bir aparatın qurulması və icra hakimiyyəti strukturlarının dəyişdirilməsi, azaldılması ehtimalını mən gözləyirəm. Çünki Qarabağ azad edildikdən sonra, Naxçıvan Muxtar Respublikasına yeni prezidentin səlahiyyətli nümayəndəsi edilməsi və Qarabağda nümayəndəliklərin təyin edilməsindən sonra bu iki səlahiyyətli nümayəndənin uğurlu işlər həyata keçirdiyini o bölgələrdə görə bilərik. Əgər Qarabağ kimi mürəkkəb bir bölgə də, bu həyata keçirilə bilirsə, ölkənin bütün sahələrində bu tipli addımlarla daha uğurlu bir icra strukturu həyata keçirilə bilər. Təbii ki, bunların cavabını 7 fevraldan sonra açıqlanacaq yeni islahatlar proqramında görə bilərik".

Telegramda izləyin