"Naxçıvan" Universitetindən məzun olan tələbələrin DİPLOMLARI TANINACAQ? - AÇIQLAMA

Xəbər verdiyimiz kimi, "Naxçıvan" Universiteti fəaliyyətini dayandıracaq. Bunu elm və təhsil naziri Emin Əmrullayev APA-nın sualına cavabında bildirib. Bəs Naxçıvan Universitetindən məzun olan tələbələrin diplomları tanınacaq?

Mövzu ilə bağlı, təhsil məsələləri üzrə ekspert Kamran Əsədov Sonxeber.az-a açıqlama verib. O, bildirib ki, Naxçıvan Universiteti 1999-cu ildə yaranmış bir universitetdir. Universitetdə çalışan işçilərin və onların elmi dərəcələrinə baxsaq görərik ki, heç də Bakıdakı universitetlərdən zəif deyil:

"Naxçıvan Universitetində 4 elmlər doktoru və 20 nəfər fəlsəfə doktoru, dosentlər var. Universitetin tələbə sayı və kontingenti kifayət qədər yaxşıdır. Universitetdə 4 fakültə və 10 dənə kafedra var. Naxçıvan Universitetində 25 ixtisas üzrə 1400-dən çox bakalavr var. Naxçıvan Universiteti kifayət qədər potensiala malik olan universitetdir. Burada tələbələrin 95 faizi məzun ola bilir. Kifayət qədər beynəlxalq layihələrdə iştirak edə bilirlər. Sadəcə olaraq son illər ərzində, 2 - ci qrupu seçənlər arasında azalmalar var idi. Naxçıvan Universiteti "Erasmus" proqramında iştirak edən universitetlər sırasında idi. Universitetin təsisçiləri belə bir qərar qəbul ediblər ki, fəaliyyətini dayandırması ilə bağlı addım atsınlar. Universitet bağlansa belə oradakı tələbələr Naxçıvanda və digər yaxın ərazilərdə öz ixtisasları üzrə köçürüləcək. Naxçıvan Universitetinin elektron universitet portalı var. Bakıda dövlət universitetlər arasında elədi var ki, elektron universitet yoxdur. Əgər konkret olaraq universitetin fəaliyyətini dayandırılması ilə bağlı qərar qəbul edilərsə, burada tələbələr üçün heç bir problem yoxdur. Universitetdən məzun olacaq olan tələbələrin diplomları tanınacaq. Çünki universitetin bağlanması onun diplomunun tanınmaması demək deyil. Çünki həmin diplomlar kifayət qədər hüquqi əsasa malikdir".

Xatırladaq ki, məzunlar diplomlarını "Naxçıvan" Universitetinin məzunu olaraq alacaqlar. Aşağı kursda oxuyan tələbələr isə digər ali təhsil müəssisələrinə köçürüləcək.

Sevda Səfərova

Telegramda izləyin