Məktəblərdə təhlükəsizliyi təmin etmək üçün hansı işlər görülməlidir? - AÇIQLAMA

Ötən gündən başlayaraq sosial şəbəkələrdə bir neçə ümumi təhsil müəssisəsində təxribat törədiləcəyi ilə bağlı məlumatlar paylaşılmaqdadır. Yayılan məlumatlardan xəbərdarıq. Bildiririk ki, məsələ aidiyyəti qurumların nəzarətindədir. Bəs məktəblərdə təhlükəsizliyi təmin etmək məqsədilə hansı addımlar atılmalıdır?

Mövzu ilə bağlı Sonxeber.az-a danışan təhsil məsələləri üzrə ekspert Elçin Əfəndi bildirib ki, hazırda ölkədə stabil bir vəziyyətdir:

"Təhsil müəssisələrində şagirdlərin və müəllim heyətinin konkret təhlükəsizliyinin qorunması ilə bağlı addımlar atılmalıdır. İlk olaraq Təhsil Nazirliyi və Müdafiə Nazirliyi arasında müəyyən bir saziş imzalanmalıdır. Müdafiə Nazirliyinin polis xidməti təhsil müəssisələrində yerləşdirilməlidir. Xidmət mütləq təşkil edilməlidir. Deyək ki, bir nəfər təhdid, şər və böhtan atır. Müvafiq olaraq şaiyə yayır. Azərbaycan Dövlət Neft və Sənaye Universitetində baş verən bir hadisənin yaşanmaması yaxud qarşısı alınması üçün sözügedən xidmət təşkil edilməlidir. İndiki məqamda təhsil müəssisələrində daim qapı bağlı saxlanılır. Çıxış məsələsində müəyyən bir məhdudiyyət var. Qapılar mühafizə tərəfidən qorunur. Amma buna baxmayaraq həmin şəxslərə qarşı adekvat cavab vermək üçün polis əməkdaşlarının orada olması vacibdir. Təhlükəsizlik ancaq belə qoruna bilər. Eyni zamanda kameraların quraşdırılmasına və daimi nəzarətə ehtiyac var. Məktəbin kənarı və auditoriyaları diqqətdə saxlanılmalıdır".

Qeyd edək ki, sosial şəbəkələrdə Azərbaycanda bir qrup şəxs tərəfindən müəyyən məktəblərdə və ticarət mərkəzində qətllərin həyata keçiriləcəyi ilə bağlı məlumatlar yayılıb. Daxili İşlər Nazirliyinin mətbuat xidmətindən bildirib ki, məsələ nəzarətə götürülüb, araşdırılır.

Sevda Səfərova

Telegramda izləyin