Qohum evliliyində doğulan körpələrdə hansı problemlər yarana bilər? - ARAŞDIRMA

Xəbər verdiyimiz kimi, Azərbaycanda qohum evlilikləri qadağan oluna bilər. Bunu Prezidentin Administrasiyasının Qanunvericilik və hüquq siyasəti şöbəsinin sektor müdiri Rüstəm Qasımov bu gün keçirilən "Qohum nikahları" ilə bağlı ictimai müzakirədə deyib.

İlk olaraq qohum evliliyi tövsiyə edilməyən nikah növüdür. Bu tip evliliklərdə bir çox genetik xəstəliklər baş verə bilər. Məlumdur ki, bu cür evliliklərdə digər evliliklərə nisbətən xəstə, qüsurlu körpələr daha çox olur.

Ginekoloq Rəşad Sultan Sonxeber.az-a açıqlamasında qohum nikahlarının körpələrdə yaratdığı fəsadlara toxunub:
"İlk olaraq bildirim ki, bizim hamımızda gizli genetik xəstəliklər var. Hər gen insanda cüt olur. İnsanlarda gen cüt olduğuna görə, genin biri defektli olanda, digər salam gen o birini kompensasiya edir. Beləliklə o özünü xəstəlik şəklində büruzə vermir. Fərdlərdə gizli xəstəliklər ola bilər. Bu zaman həmin xəstəlik gizli olaraq qalır və özünü göstərmir. Amma eyni nənə babanın nəvələri evləndikdə eyni gizli, defektli genlərin üzə çıxma ehtimalı artır. Bu zaman xəstə uşaq doğulma ehtimalı da yüksək olur. Bu zaman xəstəlik olaraq sadəcə gizli qalan gen xəstəliyi üzə çıxır".

Qohum nikahları ailə başçıları tərəfindən qərarlaşdırıldığı hallarda daha da artır. Bu halların baş verməsinin səbəblərini sosial, iqtisadi, psixoloji, dini və coğrafi amillər ilə əlaqələndirilir. Valideynlərin övladlarını qohum ilə evləndirməsinin bir səbəbi oğullarının yaxud qızlarının yadlarla deyil, "etibarlı şəxslər"lə evlənməsini görmək istəməsidir. Sosioloji tədqiqatlar onu deyir ki, bu nikahlar qohumlar arasında əlaqəni gücləndirir və cütlüklər digər ailə üzvləri daha yaxın münasibət qura bilir.

Sosioloq Mail Yaqub saytımıza mövzu ilə bağlı öz fikirlərini bölüşüb :
" Qohum nikahları labüd olaraq, hər zaman fəsadlara yol açmır. Sağlam və uğurlu qohum nikahları ola bilər. Bunu birmənalı şəkildə qəbul etmək lazımdır. Eyni zamanda bunu tamamilə qadağan etmək düzgün yanaşma deyil. Sadəcə olaraq bəzi qohum nikahları tibbi müayinədən keçirilməlidir. Əgər müayinədə həmin nikahın tibbi baxımdan fəsadları olacaqsa, o zaman imtina edilməlidir. Yoxsa ki, bütün qohum nikahları pisdir, yaxud fəsadlara yol açırmış kimi bir tezis mövcud deyil. Bunu birmənalı olaraq qadağan etməyib əleyhinəyəm".

Xatırladaq ki, qanunvericilik səviyyəsində üçüncü və dördüncü dərəcəli qohum evliliklərinin qarşısının alınması müzakirə olunur.

Sevda Səfərova

Telegramda izləyin