Aİ-95 markalı benzinin qiyməti BAHALAŞACAQ? - AÇIQLAMA

Rusiyada neft emalı müəssisələrində yaranan problemlər və yanacaq istehsalının azalması regionun yanacaq bazarına da təsir göstərə biləcək amillərdən biridir.

Bəs, Rusiyada neft emalı və yanacaq istehsalında yaranan problemlər Azərbaycanda benzin qiymətlərinə hansı formada təsir göstərə bilər və xüsusilə Aİ-95 benzininin qiymətində artım ehtimalını artıran əsas amillər hansılardır?
Mövzu ilə bağlı Sonxeber.az-a açıqlama verən İqtisadçı ekspert Xalid Kərimli bildirib ki, Rusiyaya endirilən zərbələr əsasən neft emalı zavodlarının fəaliyyətinə təsir göstərir.

"Rusiyada neft məhsullarının çatışmazlığı hiss olunur və bu, ölkənin neft məhsulları ixrac etdiyi dövlətlərdə təklifin azalmasına səbəb ola bilər. Azərbaycan da Rusiyadan neft məhsulları idxal edir, lakin Cənubi Qafqazda bu idxalın həcmi ən aşağı olan ölkədir. 2026-cı ilin ilk yeddi ayında Azərbaycana 400 milyon dollarlıq neft məhsulu idxal edilib. Bu baxımdan, prosesin Ermənistana və Gürcüstana Azərbaycandan daha ciddi təsir göstərəcəyi düşünülür. Neft qiymətlərinə Rusiyadakı vəziyyətlə yanaşı, Hörmüz boğazı ətrafındakı hadisələr və Husilərin zərbələri də təsir edir".

Ekspert bildirib ki, Azərbaycanda yanacaq defisiti gözləmir:

"92 markalı benzin və dizelin qiyməti Tarif Şurası tərəfindən tənzimlənir, 95 markalı benzinin qiyməti isə əsas idxalçı olan SOCAR tərəfindən müəyyən edilir. Hazırkı vəziyyətin xüsusilə 92 markalı benzin və dizelin qiymətinə dərhal təsir edəcəyini düşünmürəm. Bununla belə, dünya bazarında neft və yanacağın bahalaşması idxal xərclərini artıra və nəticədə ərzaq və digər məhsulların qiymətlərinə təsir göstərə bilər".

Onun sözlərinə görə, Aİ-95 markalı benzinin qiyməti Tarif Şurası tərəfindən tənzimlənmir, SOCAR tərəfindən müəyyənləşdirilir:

"SOCAR bu benzini yalnız özü istehsal etmir, xaricdən də idxal edir. Qiymət müəyyənləşdirilərkən idxal müqavilələrinin qiymətləri də əsas götürülür. Yəni premium benzini neçəyə alırsa, onun üzərinə öz qazancını qoyaraq qiyməti müəyyənləşdirir. Xaricdən alınan Aİ-95 markalı benzinin qiyməti bahalaşarsa, Azərbaycanda da müəyyən müddətdən sonra bu artım nəzərə alına bilər. Dərhal olmasa da, müəyyən vaxt intervalları ilə qiymətə təsir göstərir".

Röyalə Xəyal

Telegramda izləyin