Keçmiş nazir qadağanı fürsətə çevirir: "TikTok" o alacaq!

ABŞ-nin keçmiş maliyyə naziri Stiven Mnuçin ölkədə "milli təhlükəsizliyə problem yaratdığı" iddiası ilə qadağan olunmaq təhlükəsi ilə üzləşən TikTok-u almaq üçün investor qrupu yaradacağını açıqlayıb.

Sonxeber.az xarici mənbəyə istinadən xəbər verir ki, Stiven Mnuçin "CNBC" televiziyasına verdiyi müsahibədə Nümayəndələr Palatasında qəbul edilən və Senata göndərilən "Amerikalıların Xarici Düşmənlər Qanunu ilə Nəzarət Edilən Tətbiqlərdən Qorunması" adlı qanun layihəsinin qəbul edilməli olduğunu və "TikTok"un satılmalı olduğunu bildirib.

TikTok almaq üçün qrup quracağını deyən Mnuçin, "Bu, ABŞ bizneslərinə aid olmalıdır. Çinlilərin ABŞ şirkətinin Çində belə bir şeyə sahib olmasına icazə verməsi mümkün deyil" deyib. Mnuçin belə bir razılaşmada digər investorların kim olacağını dəqiqləşdirməsə də, ABŞ-nin Google və Meta kimi texnologiya nəhənglərinin antiinhisar problemləri yarada biləcəyi üçün satınalma qrupuna daxil edilməyəcəyini bildirib.

İstifadəçilərin tətbiqi sevdiyini və bağlanmamasını müdafiə edən Mnuçin, "Tətbiqin ABŞ-də yenidən yaradılmasına ehtiyac var. Bu, bizim texnologiyamız olmalıdır. Çinlilərin nəzarəti altında olmamalıdır. Ümid edirəm ki, bir proqram tapa biləcəyik. Çinin texnologiya transferi olmadan satılmasına icazə verəcəyi həll mütləq olacaq" deyə fikirlərini tamamlayıb.

Telegramda izləyin