Sumqayıtda qızını suda boğaraq öldürən atanı HANSI CƏZA GÖZLƏYİR? - AÇIQLAMA

Xəbər verdiyimiz kimi, martın 31-də Sumqayıt şəhəri ərazisində dəniz sahilində uşaq meyitinin aşkar edilməsi barədə şəhər prokurorluğuna məlumat daxil olub. Dəniz sahilində meyiti tapılan uşağın qətlə yetirilməsi məlum olub və atası 1984-cü il təvəllüdlü Ahmet Turan Yeşil şübhəli şəxs qismində saxlanılıb.

Bu zaman istintaq nəticəsində, sözügedən şübhəli şəxsi hansı cəza gözləyir? Mövzu ilə bağlı hüquqşünas Şamil Paşayev Sonxeber.az-a açıqlama verib:

"Əgər şəxsin qəsdən öldürülməsi müəyyən edilərsə, Cinayət Məcəlləsinin 120.1-ci maddəsi ilə (qəsdən adam öldürmə) cinayət işi açılacaq. Cinayət işi zamanı istintaq sübuta yetirsə ki, bu adam köməksiz vəziyyətdə olan şəxsi qəsdən öldürübsə, belə olan halda müvafiq işlər görüləcək. Bununla da Cinayət Məcəlləsinin 120.2-ci maddənin müvafiq bəndləri tamamlanıb cinayət işi məhkəməyə göndərilə bilər. Belə olan halda şəxsi 14 ildən 20 ilə qədər azadlıqdan məhrum etmə yaxud ömürlük azadlıqdan məhrum etmə cəzası verilə bilər".

Qeyd edək ki, faktla bağlı Sumqayıt Şəhər Prokurorluğunda Cinayət Məcəlləsinin 120.2.9-cu (təqsirkar şəxs üçün aşkar surətdə köməksiz vəziyyətdə olan adamı öldürmə) maddəsi ilə cinayət işi başlanıb, Yeşil Ahmet Turan prokurorluğun qərarı ilə iş üzrə şübhəli şəxs qismində tutulub. Hazırda cinayət işi üzrə ibtidai istintaq davam edir.

Sevda Səfərova

Telegramda izləyin