Təxribatlar davam edərsə Azərbaycan-Ermənistan müharibəsi yenidən başlayacaq? - AÇIQLAMA

Ermənistan silahlı qüvvələrinin bölmələri Naxçıvan istiqamətində mövqelərimiz atəşə tutub.Bu barədə müdafiə Nazirliyi məlumat yayıb. Bildirilib ki, aprelin 1-də saat 22:00-dan 22:20-dək Ermənistan silahlı qüvvələrinin bölmələri Dəvəli rayonunun Arazdəyən, Qarakilsə rayonunun Saybalı yaşayış məntəqələri istiqamətlərində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan fasilələrlə atəşə tutub.

Bununla bağlı Sonxeber.az-a danışan deputat Aydın Mirzəzadə bildirib ki, Ermənistan hələ də normal qonşuluq münasibətləri çərçivəsinə sığa bilmir:

"Hələ də Ermənistanın beynində SSRİ-nin tərkibində ona verilən ədalətsiz dəstək fikirləri var. Ermənistana elə gəlir ki, hər hansı bir sehirli çubuq onun Azərbaycan torpaqlarına qarşı iddiasını həyata keçirəcək. Aprelin 1-də Ermənistan silahlı qüvvələrinin bölmələri Dəvəli rayonunun Arazdəyən, Qarakilsə rayonunun Saybalı yaşayış məntəqələri istiqamətlərində yerləşən mövqelərindən Azərbaycan Ordusunun Naxçıvan Muxtar Respublikasının Sədərək rayonunun Heydərabad və Şahbuz rayonunun Biçənək yaşayış məntəqələri istiqamətlərindəki mövqelərini atıcı silahlardan fasilələrlə atəşə tutması və sərhədə çoxlu sayda qoşun yığması bu dövlətin yenidən təxribatlar törədəcəyindən xəbər verir. Ancaq Ermənistan aprel döyüşlərindəki, 44 günlük Vətən müharibəsindəki və 1 günlük antiterror əməliyyatındaki biabırçı məğlubiyyətini unutmamalıdır. Əgər Ermənistan bu biabırçı məğlubiyyətlərini unudarsa Azərbaycan yenidən ona xatırlada bilər. Azərbaycanı heç kim suveren hüquqlarından çəkindirə bilməz. Ermənistan birdəfəlik anlamalıdır ki, Azərbaycanla münasibətlərdə yeganə alternativ yol mehriban qonşuluq münasibətlərində olmaq, sülh müqaviləsini imzalamaq və təxribatçı addımlardan çəkinməkdir".

Telegramda izləyin