Azərbaycanda minimum əməkhaqqı vergidən azad edilir? - AÇIQLAMA

Azərbaycanda minimum əməkhaqqı 350 manatdır. Bu gün ən çox təklif olunan məsələlərdən biri minimum əməkhaqqının və pensiyanın artırılmasıdır. Dövlət və özəl sektorda çalışan vətəndaşlar minimum əməkhaqqı aldığı təqdirdə vergiyə cəlb olunur. Vətəndaşların sosial təminatını gücləndirmək məqsədilə minimum əməkhaqqı vergidən azad edilə bilər?

Mövzu ilə bağlı bank məsələləri üzrə ekspert, hüquqşünas Əkrəm Həsənov Sonxeber.az-a açıqlama verib:

"Əvvəla minimum əməkhaqqının vergidən azad edilməsi ilə bağlı bir sıra məqamlar var. Belə ki, hələ iki il müddətinə əmək haqları gəlir vergisindən azaddır. 5 il əvvəl qanun olaraq qəbul edilib. Digər tərəfdən 200 manata qədər maaşlar vergidən azaddır. Hazırda minimal maaş 345 manatdır. Amma minimal əməkhaqqının vergidən azad olunması mümkündür. Vətəndaşların sosial təminatının yaxşılaşdırılması istiqamətində bu kimi addımlar atıla bilər. Sözügedən istiqamətdə müəyyən işlər görmək olar və bu hər hansı bir problem yaratmır. Lakin görüləcək tədbirlər çərçivəsində bu məsələ aktual deyil və gündəmə gətirilməyib. Onsuzda maaşlar vergidən azad olduğu üçün indiki məqamda buna ehtiyac yoxdur".

Xatırladaq ki, cari ilin ortaları pensiyaların yenidən artırılacağı gözlənilir. Büdcə gəlirlərinin artacağı ilə bağlı proqnozlar özünü doğrultmaq üzrədir. Bununla yanaşı, qarşıdakı aylarda büdcəyə yenidən baxıla bilər və 2024-cü ilin ortalarında maaş və digər sosial müavinətlərin yenidən artırılması da mümkündür.

Sevda Səfərova

Telegramda izləyin