"Nikol Paşinyan Ermənistanı tam şəkildə qərbin sərəncamına vermək istəyir" - DEPUTAT

"Sabah Brüsseldə keçiriləcək ABŞ-Aİ-Ermənistan görüşü Azərbaycana qarşı yönəlmiş növbəti təxribatdır".

Bunu Sonxeber.az-a danışan deputat Aydın Hüseynov bildirib.

Deputat qeyd edib ki, bu gün Fransa Ermənistanı yeni müharibəyə hazırlayaraq regionda mövcud sülh prosesinə əngəl olmağa çalışır:

"Blinkenin cənab prezident İlham Əliyevə zəng etməsi dövlət başçımızın qlobal müstəvidə yüksək nüfuza malik olduğunu bir daha sübut edir. Azərbaycan BMT Təhlükəsizlik Şurasının 4 qətnaməsini təkbaşına yerinə yetirərək ərazi bütövlüyünu təkbaşına bərpa edən güclü dövlətdir. Bu gün Ermənistan sülh müqaviləsindən imtina etmək və Rusiyadan qurtulmaq üçün Avropanın, ABŞ-ın həqiqi dəstəyini qazanmağa çalışır. Yaxşı olar ki, Ermənistan Ukrayna məsələsini unutmasın. Çünki sözdə dəstək vəd edən qərb Ukrayna kimi Ermənistanı da yarı yolda buraxacağı məlumdur".

Deputat vurğulayıb ki, bu gün Nikol Paşinyan Ermənistanı tam şəkildə qərbin sərəncamına vermək istəyir:

"Bu gün Ermənistan Fransa və qərbin hərbi platsdarmına çevrilir. Hazırda Cənubi Qafqaz üzərində cərəyan edən geosiyasi oyunları III Dünya müharibəsinin və dünyanın yenidən bölünməsi ssenarisinin tərkib hissəsi kimi də dəyərləndirmək olar. 30 il ərzində davam edən status-kvo Azərbaycan və qardaş Türkiyədən başqa heç bir ölkəni narahat etmirdi. Əlbəttə də bu Azərbaycan torpaqlarının işğalına və Cənubi Qafqazda ikinci erməni dövlətinin yaranmasına hesablanmış oyun idi. 44 günlük Vətən müharibəsindəki möhtəşəm zəfərlə Ali Baş Komandan İlham Əliyev bu ssenarini darmadağın etdi. Hazırda regionda yeni reallıq və status-kvo hökm sürür. Ermənistan və havadarları regiondakı yeni reallıqla barışmalı və tezliklə sülh müqaviləsini imzalamalıdır".

Telegramda izləyin