Tarixin onuncu milyarder idmançısı oldu

"Əl-Hilal"ın hücumçusu Neymar karyerasında bir milyard dollar qazanıb.

Lent.az bildirir ki, bu barədə "Transfer News Live" məlumat yayıb.

Mənbənin məlumatına görə, 32 yaşlı braziliyalı peşəkar karyerasına başlayandan 933,2 milyon avro (1,01 milyard dollar) qazanıb. Bu məbləğə maaşlar, sponsorluq müqavilələri və digər gəlir mənbələri daxildir.

Beləliklə, Neymar karyerasında 1 milyard dollar qazanmağı bacaran onuncu idmançı olub.

Milyarder idmançıların siyahısı

1. Maykl Cordan (ABŞ, basketbol) - 2,7 milyard dollar;

2. Tayqer Vuds (ABŞ, qolf) - 1,85 milyard dollar;

3. Kriştiano Ronaldo (Portuqaliya, futbol) - 1,57 milyard dollar;

4. Lebron Ceyms (ABŞ, basketbol) - 1,36 milyard dollar;

5. Lionel Messi (Argentina, futbol) - 1,36 milyard dollar;

6. Rocer Federer (İsveçrə, tennis) - 1,17 milyard dollar;

7. Floyd Meyvezer (ABŞ, boks) - 1,14 milyard dollar;

8. Devid Bekhem (Böyük Britaniya, futbol) - 1,13 milyard dollar;

9. Fil Mikelson (ABŞ, qolf) - 1,05 milyard dollar;

10. Neymar (Braziliya, futbol) - 1,01 milyard dollar.

Neymar ötən yay "Əl-Hilal"a keçib. Braziliyalı Səudiyyə Ərəbistanı klubunda 5 oyun keçirib, 1 qol vurub və 3 məhsuldar ötürmə edib. Noyabr ayında Neymar ön çarpaz bağından və menisküsün cırılmasından əməliyyat olunub və bu da onu uzun müddət kənarda oturmağa məcbur edib.

Jurnalist Fabritsio Romanonun sözlərinə görə, bütün bonuslar və reklam müqavilələri nəzərə alınmaqla, Neymar Səudiyyə Ərəbistanında ildə təxminən 200 milyon avro qazanır.

Telegramda izləyin

instagramda izləyin