Yeni MÜHARİBƏ ANONSU: Ermənistan Göyçə istiqamətində NƏ PLANLAŞDIRIR? - ŞƏRH

Göyçənin qubernatoru Karen Sərkisyan parlamentdə jurnalistlərin suallarını cavablandırıb. Onun sözlərinə görə, Ermənistan Azərbaycan qoşunlarının Göyçə mahalından çıxarılması üçün başqa vasitələrə əl atacaq. Bununla bağlı mətbuatda məlumatlar yayılıb. K.Sərkisyan bildirib ki, Azərbaycan qoşunlarını Göyçə bölgəsinin ərazilərindən geri çəkməlidir. Jurnalistlər "bəs geri çəkilməsələr, hansı addım atılacaq" sualına K.Sərkisyan belə cavab verib:

"Onları geri çəkilməyə məcbur etmək üçün başqa vasitələrdən istifadə olunacaq. Müxtəlif amillərdən istifadə oluna bilər, güc variantı da bura daxildir, amma güc son vasitədir".

Danışıqlar proseslərinin getdiyi bir vaxtda Ermənistan yeni təxribata hazırlaşır? Yeni müharibənin baş verməsi gözləniləndir?

Mövzunu Sonxeber.az-a şərh edən hərbi ekspert Səxavət Məmmədin deyib ki, 2022-ci ilin sentyabr ayında məlum olduğu kimi, sərhəd toqquşması baş verdi. Bu sərhəd toqquşması zamanı Azərbaycan Ordusu bütün istiqamətlər üzrə əməliyyatlar həyata keçirdi:

"Beləliklə strateji yüksəkliklərin hamısını nəzarətə götürdü. Bu sərhədin təhlükəsizliyi üçün lazım idi. Çünki əvvəl həmin istiqamətlərdə olan erməni bölmələri Azərbaycan Ordusunun sərhədlərinə problemlər yaradırdı. Gələcəkdə bu problemlərin olacağı açıq şəkildə görünürdü. Hesab edirəm ki, ona görə də bu vacib bir məsələ idi və Azərbaycan Ordusu bunu həyata keçirdi".

Ekspertin sözlərinə görə, indiki halda Ermənistan tərəfi bununla bağlı müxtəlif açıqlamalar verirlər. Bildirirlər ki, hansısa addımlar ata bilərlər:

"Mən düşünmürəm ki Ermənistan tərəfi uğurlu hərbi əməliyyat həyata keçirsin və o mövqeləri geri qaytarsın. Azərbaycan Ordusu kifayət qədər bölgədə istehkam işləri həyata keçirib. İkincisi Paşinyan hakimiyyəti müharibə etmək istəmir. Daha çox sülhün tərəfdarıdır. Hesab edirəm ki, indiki məqamda Ermənistan tərəfindən hərbi istiqamətdə atılacaq bir addım yeni müharibənin başlanmasına gətirib çıxara bilər. Bunu Ermənistan indiki mərhələdə qarşısına ala bilməz. Bunlar sadəcə olaraq hansısa ermənilərin düşüncəsi ola bilər. Hesab edirəm ki, bu məsələ ciddi nəticə verməyəcək".

Sevda Səfərova

Telegramda izləyin