Paşinyan Köçəryanla Sarkisyanı təhvil verəcək: Pərdəarxası hansı oyunlar GEDİR? - ŞƏRH

Xəbər vrdiyimiz kimi, Ermənistanda seçkilər elan ediləndə Paşinyan Robert Köçəryanı və Serj Sarkisyanı həbs edərək, Azərbaycana təhvil verəcək. Bu barədə erməni diplomat, keçmiş səfir Edqar Qazaryan deyib. Qazaryan bildirib ki, Azərbaycan Prezidenti İlham Əliyev Ermənistanın Xocalıya görə üzr istəməsini gündəmə gətirib. Erməni diplomat hesab edir ki, müxalifət növbədənkənar və ya xüsusi seçkilər elan edəndə həbslər başlayacaq. Həbs olunanlar arasında Köçəryan və Sarkisyan da olacaq. Belə olan halda ilkin sülh müqaviləsinin şərti olaraq Sarkiyan və Köçəryan, o cümlədən digər Xocalı qatillərinin təhvil verilməsi mümkündür:

Mövzu ilə bağlı Sonxeber.az-a danışan politoloq Turab Rzayev deyib ki, bu fikirlər daha çox Ermənistanda müxalifətin Paşinyana qarşı apardığı qaralama kampaniyasıdır:

"Onlar çalışırlar ki, Paşinyan hakimiyyətini devirsinlər və bunun üçün hər yoldan istifadə edirlər. Hazırda bütün müxalifət və müxtəlif media, Rusiyanın və Qarabağdan olan "klan"ın cinayət qrupu, kilsə tərəfdarları birləşərək Paşinyan hakimiyyətini devirməyə çalışırlar. Faktiki olaraq Köçəryan, Sarkisyan, Ohanyan və Balasanyan müharibə cinayətkarıdır. Onlar Azərbaycan ərazisində qırğınlar törədərək, kəndlərimizi işğal edərək özlərini general elan edib. Daha sonra isə Ermənistanda vəzifəyə yüksəliblər. Onlar ölkəni korrupsiya və rüşvətlə ölkəni dağıdırlar. Ölkənin demək olar ki, əksəriyyəti xaricə qaçıb və resursları tükənib. Artıq ölkə bataqlıqdadır".

Politoloqu sözlərinə görə, təsadüfi deyil ki, 44 günlük müharibədən sonra Ermənistanın biabırçı şəkildə məğlub olmasına baxmayaraq, Paşinyan seçkilərdə qələbə çaldı:

"Ermənistan cəmiyyəti keçmiş cinayətkarları və Qarabağ "klan"larına hakimiyyəti təhvil etmək istəmir. Ona görə də onlar xalq arasında "milli" hissləri qabartmağa çalışırlar. Müxtəlif böhtanlar ilə Paşinyan hakimiyyətini zəiflətməyə çalışırlar. Revanşistlər hakimiyyətə gəlsə guya Qarabağı Azərbaycandan ala biləcəyinə inandırmağa çalışırlar. Ona görə Serj Sarkisyan və Köçəryanın həbs məsələsi qaldırılıb. Paşinyan seçkilərdə yenə qalib gələrsə, Sarkisyan və Köçəryanı həbs edib Azərbaycana verəcəklər kimi versiyalar səsləndirilir. Mən erməni xalqının hakimiyyəti onlara verəcəyini düşünmürəm".

Telegramda izləyin

instagramda izləyin