Bakının mərkəzində turist gəzdirən faytona sahib çıxan qurum tapılmadı

Bakıda, şəhərin tam mərkəzində yerləşən Neftçilər prospektində hərəkət edən faytona qoşulu at şəhər sakinlərinin diqqətini çəkib.

Oxu.Az xəbər verir ki, bununla bağlı redaksiyaya videogörüntü göndərilib.

Qeyd olunub ki, Qız qalasının yanından Azneft meydanı istiqamətində turist daşımaqla məşğul olan faytona qoşulu at baxımsız haldadır.

"Onun ayağı qanadığı halda belə, sahibi şəhər mərkəzində onunla turist daşımağa davam edir", - deyə şikayətçi bildirib.

Məsələ ilə bağlı Dənizkənarı Bulvar İdarəsinə sorğu ünvanladıq. Qurumun Mətbuat Xidmətindən Oxu.Az-ın sorğusuna cavab olaraq bildirildi ki, sözügedən fayton bulvar ərazisində deyil, Neftçilər prospektində hərəkət edir: "Prospektə isə biz cavabdeh deyilik".

Bu dəfə Bakı Şəhər İcra Hakimiyyətinə sorğu ünvanladıq. Qurumdan Oxu.Az-ın sorğusuna cavab olaraq bildirildi ki, faytona nəzarət qurumun səlahiyyətinə daxil deyil.

Növbəti dəfə sualımızı İçərişəhər Dövlət Tarix-Memarlıq Qoruğu İdarəsinə ünvanladıq. Qoruq İdarəsi də, digər qurumlar kimi, faytonun onların nəzarətində olmadığını diqqətə çatdırdı.

"Ərazi bizim nəzarətimizdə deyil və faytonun da bizə aidiyyəti yoxdur", - deyə açıqlamada bildirildi.

Telegramda izləyin