Tələbələrin hesabına "yaşayan" UNİVERSİTETLƏR: Hansı güzəştlər EDİLMƏLİDİR? - AÇIQLAMA

Universitetlərdə təhsil haqları ildən-ilə artmaqdadır. Lakin bəzi müəssisələr ödənişləri artırsa da, verdikləri təhsilin keyfiyyəti həmin qiymətə cavab vermir. Yəni müəyyən universitetlərdə xərclər süni yolla artırılır. Belə bir məsələ var ki, tələbə ödənişi gecikdirirsə yaxud təhsil haqqını qarşılaya bilmirsə, imtahana buraxılmır. Eyni zamanda bu proses uzunmüddətli olarsa, tələbə dərslərə qatıla bilmir və bu da onun təhsil həyatında ciddi problemlər yaradır

Bu baxımdan universitetlər tələbələrin sosial vəziyyətini nəzərə almalıdır. Bəzi universitetlər bunu edir və tələbyə əlavə vaxt verir. Lakin tələbəyə bu şansı verməyən müəssisələrin sayı az deyil. Bəzi ekspertlərin fikrincə, universitetlər tələbənin təhsil haqqı hesabına "yaşamamalı"dır. Yəni universitetlər müəyyən mənada özünü tələbələrin təhsil haqları xaricində, özünü maliyyələşdirməyi bacarmalıdır.

Amma mövzunun əsas hissəsi tələbələr ilə bağlıdır. Təhsil haqqını gecikdirən və ödəyə bilməyən tələbələrə hansı güzəştlər edilməlidir?

Mövzu ilə bağlı Sonxeber.az-a danışan təhsil məsələləri üzrə ekspert Vüsal Kərimli deyib ki, bəzi universitetlər tələbələr təhsil haqlarını tam ödəmədikləri üçün imtahanlara buraxılmır:

"Tələbələr müəyyən ərizə ilə müraciət edirlər və müddət istəyirlər. Amma bəzi universitetlər tələbələri təhsil haqqını tam ödəmədikləri üçün imtahana buraxmırlar. Bu proses var. Eyni zamanda bir sıra universitetlər tələbələrin maddi vəziyyətini nəzərə alır və bir sıra güzəştlər tətbiq edirlər. Amma düşünürəm ki, bu universitetin tam haqqıdır. Çünki universitet rəhbərliyi müəllimlərinə əməkhaqqı ödəyir. Müəllimlərin əməkhaqqının ödənilməsi və digər xərclərin qarşılanması birbaşa universitetin öhdəliyidir".

Ekspertin sözlərinə görə, tələbə təhsil haqqını ödəməlidir ki, universitetlər özünü maliyyələşdirə bilsin. Bu və ya digər səbəbdən tələbənin sosial problemi varsa, tələbə bu zaman Tələbə Kredit Fonduna müraciət edə bilər:

"Tələbə artıq bununla əlaqədar müəyyən məbləğdə kredit götürə bilər. Hamımız yaxşı bilirik ki, təhsil investisiyadır. Təhsil maliyyə tələb edir. Burada valideynləri başa düşmək olar. Ailədə bəzən maddi sıxıntılar yarana bilir. Amma bundan heç kim sığortalanmayıb. Bəzən universitetlər belə halları nəzərə alırlar. Amma düşünürəm ki, burada universitetlərin heç bir günahı yoxdur. Universitetlər özlərini maliyyələşdirən müəssisələrdir. Tələbələrın ödədiyi təhsil haqlarının yarısı müəllimlərin əməkhaqqına yönəldilir. Bu zaman universitet öz öhdəliklərini icra edə bilmədikdə məcburən bu yollara əl atır".

Sevda Səfərova

Telegramda izləyin