Trampa sui-qəsd edən şəxsin meyiti YOXA ÇIXIB

Ötən ay 20 yaşlı Tomas Metyu Kruks ABŞ prezidentliyinə namizəd Donald Trampa sui-qəsd təşkil etməyə cəhd edib. Hətta sözügedən şəxslə bağlı bir sıra məqamlar üzə çıxmışdı. "The Telegraph" nəşrinə görə, keçmiş sinif yoldaşları onun hədəfi pis və təhlükəli nişan aldığı üçün məktəbin atış dərslərindən uzaqlaşdırıldığını deyib.

Sonxeber.az xarici mənbəyə istinadən xəbər verir ki, konqresmen Klay Hiqqinsin hesabatında yeni məqamlar üzə çıxıb. Hesabata görə, Trampa sui-qəsd cəhdi edən Tomas Metyu Kruksun meyiti "yoxa çıxıb".

Hiqqins avqustun 5-də Kruksun cəsədini görmək istədikdə, FTB-nin hadisədən 10 gün sonra cəsədi ailəsinə qaytardığını öyrənib. O, bildirib ki, yerli hakimiyyət orqanları və tibbi ekspertizanın bundan xəbəri yoxdur. FTB bu qərarı versə də ekspertizanın meyit üzərində qanuni səlahiyyətləri var.

Hesabat sui-qəsdin necə baş verməsi ilə bağlı narahatlıqları yenidən gündəmə gətirib. Məxfi Xidmət rəisi Kimberli Çitl iyulun 23-də istefaya getməyə məcbur olub, lakin hələ də cavabsız qalan suallar var. Hiqqins deyir ki, o, avqustun 4-dən 6-dək Butlerə səfəri zamanı öz araşdırmasını aparıb. FTB-nin cəsədi heç bir nəzarət olmadan ailəyə qaytarması sual altındadır və bunun gələcək istintaq səylərinə mane ola biləcəyi ifadə edilir.

Hiqqins FTB-nin bu hərəkətlərini "çox narahatedici" adlandırır və Amerika xalqının Trampa qarşı sui-qəsd cəhdi ilə bağlı tam həqiqəti bilməyə layiq olduğunu vurğulayır.

Xatırladaq ki, 78 yaşlı Tramp Pensilvaniyada mitinq zamanı hücuma məruz qalıb. Tramp sağ qulağından yaralanıb. Federal Təhqiqat Bürosunun məlumatına görə, keçmiş prezidentə 20 yaşlı Tomas Metyu Kruks atəş açıb. Onun Məxfi Xidmət agentləri tərəfindən zərərsizləşdirildiyi bildirilib. Kruksun hadisəni hansı səbəbdən törətdiyi məlum deyil.

Telegramda izləyin