Haylar yenə də DİNC DAYANMIR: Erməni təxribatında pərdəarxası MƏQAMLAR - ŞƏRH

Xəbər verdiyimiz kimi, Kəlbəcərdə mövqelərimiz atəşə tutulub. Avqustun 18-i saat 23:50-də Ermənistan silahlı qüvvələrinin bölmələri Basarkeçər rayonunun Zərkənd yaşayış məntəqəsi istiqamətində yerləşən mövqelərindən Ordumuzun Kəlbəcər rayonunun Dəmirçidam yaşayış məntəqəsi istiqamətində yerləşən mövqelərini atıcı silahlardan atəşə tutub. Bu barədə Müdafiə Nazirliyi məlumat yayıb. Bölmələrimiz tərəfindən qeyd olunan istiqamətdə adekvat cavab tədbirləri görülüb.

COP29 tədbiri ərəfəsində Ermənistan tərəfi sakit dayanmır. Görünən odur ki, qarşı tərəf son 4 ildə baş verən hadisələrdən dərs çıxartmaq niyyətində deyil. Burada məqsəd Azərbaycanı yeni müharibəyə cəlb etməkdir. Bu baxımdan vəziyyət hərbi komandanlığın nəzarəti altındadır. Bəs Ermənistanın atəşkəsi pozmasında başqa hansı məqamlar var?

Mövzunu Sonxeber.az-a şərh edən Tərlan Eyvazov deyib ki, atəşkəsin pozulma hallarını bir sıra məqamlar ilə əlaqələndirmək mümkündür:

"Bunu bilavasitə COP29 tədbiri, Rusiya Prezidenti Vladimir Putinin Azərbaycana səfəri və yaxud Ermənistan-Amerika arasında olan hərbi əməkdaşlığa bağlamaq olar. Ən əsası odur ki, məhz bu məsələlər Naxçıvan istiqamətində baş verir. Digər bir səbəb kimi, Naxçıvan hərbi birləşməsinə yeni bir komandanın təyin olmasını göstərərdim. Ola bilər ki, bu həm də bir nəbz yoxlamasıdır. Yeni komandan yerində bərkiməmiş çaşqınlıq yaratmaq istəyirlər. Hər bir halda bu Ermənistan tərəfinin özünün bildiyi bir təxribatdır".

Eskpertin sözlərinə görə, artıq bunu hansısa bir hakimiyyətə tabe olmayan qurumun provokasiyası kimi qiymətləndirmək düzgün deyil:

"Ona görə ki, Ermənistan tərəfi nəinki belə qurumların olduğunu deyir, hətta atəşkəsin pozulması halını etiraf belə etmir. Bütün bu səbəblərin hamısı ola bilər. Bütün səbəbləri toplayaraq bir nəticəyə gəlməliyik. Təbii ki, belə bir hadisənin səviyyəli beynəlxalq tədbirin Azərbaycanda keçirilməsi ərəfəsində baş verməsi ölkəmizi cavab verməyə sövq etməkdir. Bununla da müəyyən mənada Azərbaycanın qeyri-sabit ölkə olması görüntüsünü yaratmağa çalışmaqdır və bu mümkün deyil. Azərbaycan hakimiyyəti və hərbi komandanlığı məsələyə soyuqqanlı yanaşır. Cavab tədbirləri adekvat görülməklə susdurulur".

Xatırladaq ki, avqustun 18-i saat 19:30-da Ermənistan silahlı qüvvələrinin bölmələri Azərbaycan Ordusunun Naxçıvan Muxtar Respublikasının Culfa rayonunun Ləkətağ yaşayış məntəqəsi istiqamətində yerləşən mövqelərini atıcı silahlardan atəşə tutub. Bölmələrimiz tərəfindən qeyd olunan istiqamətdə adekvat cavab tədbirləri görülüb.

Sevda Səfərova

Telegramda izləyin