Qonşular arasında dava ölümlə nəticələndi

Ankaranın Keçiören rayonunda 3 gün əvvəl qonşular arasında yaranan mübahisə silahlı qarşıdurma ilə nəticələnib. Məcnun Ekinci 4 nəfəri silahla vurub. Hadisə zamanı 3 nəfər ölüb, 1 nəfər yaralanıb, şübhəli şəxs isə hadisə yerindən qaçıb.

Sonxeber.az türk mediasına istinadən xəbər verir ki, hadisə gecə saat 00:00 -da Keçiören rayonu Yayla məhəlləsində baş verib. İddiaya görə, 3 gün əvvəl mübahisə edən qonşular arasında dava böyüyüb. Məcnun Ekinci qonşuları Mücahit Zurnacı, Murat Zurnacı, Şengül Zurnacı və Mustafa Öztürkə silahla atəş açaraq qaçıb. Qonşuların məlumatı üzərinə hadisə yerinə polis və təcili tibbi yardım sövq edilib. Polis bölgədə təhlükəsizlik tədbirləri görməyə başlayıb. Təcili tibbi yardım əməkdaşları tərəfindən aparılan yoxlama zamanı Mücahit Zurnacı, Murat Zurnacı və Mustafa Öztürkün həyatını itirdiyi müəyyən edilib. Xəstəxanaya çatdırılan Şengül Zurnacı həkimlərin ilk müdaxiləsindən sonra müalicəyə alınıb. Həyatını itirən 3 nəfərin cəsədi tibbi ekspertizaya göndərilib.

Polis şübhəlinin tutulması üçün əməliyyat başladıb. Hadisə ilə bağlı başladılan istintaq davam edir.

Telegramda izləyin