9 aylıq körpənin üstünə isti kofe töküb yandırdı

Avstraliyada naməlum şəxs parkda 9 aylıq körpənin üzərinə isti kofe tökərək bədənini yandırıb.

Sonxeber.az xarici mediaya istinadən xəbər verir ki, avqustun 31-də Avstraliyanın Kvinslend ştatının Brisben şəhərindəki parkda baş verən hadisə ölkənin əsas gündəminə çevrilib.

Hadisə şahidlərinin sözlərinə görə, naməlum kişi piknik edən ailəyə yaxınlaşaraq, əlindəki isti kofeni 9 aylıq körpənin üzərinə töküb və sonra hadisə yerindən qaçıb.

Kvinslend polisi 33 yaşlı təcavüzkar haqqında həbs qərarı çıxarıb. Şübhəlinin 6 gün sonra ölkədən qaçdığının müəyyən edilib. Hücumun hansı səbəbdən həyata keçirildiyi hələlik məlum deyil.

İstintaqı aparan müfəttiş Paul Dalton verdiyi açıqlamada hadisənin indiyə qədər gördüyü "ən mürəkkəb" hadisə olduğunu bildirib.
Təcavüzkarın ölkədən qaçdığı müəyyən edildikdən sonra Avstraliya polisi digər ölkələrdən dəstək istəyib.

Dalton qeyd edib ki, hücum edən şəxs 2019-cu ildən Avstraliyada yaşayır.

Körpənin ailəsi açıqlamasında bildirib ki, onun vəziyyəti yaxşı deyil. Körpənin dəri transplantasiyasına ehtiyacı ola bilər. Körpə üçün açılan yardım səhifəsində indiyə qədər 100 min dollar toplanıb.

Hadisəylə bağlı istintaq davam edir.

Telegramda izləyin