""The Guardian" hər zaman ermənilərin maraqlarından çıxış edib" - AÇIQLAMA

BMT-nin builki iqlim sammitinə ev sahibliyi edən Azərbaycan konfransla eyni vaxtda qlobal atəşkəsə çağırış etdiyi üçün ikiüzlülükdə ittiham olunur.

"The Guardian"da dərc olunan "Azərbaycan COP29-da qlobal atəşkəsə çağırdıqdan sonra ikiüzlülükdə ittiham olunur" adlı məqalədə belə deyilir.

"Ukrayna ilə Rusiya, İsrail və Qəzza arasındakı münaqişələr - hər ikisi Azərbaycanla həmsərhəd bölgələrdə konfransa kölgə salacaq. Rusiya qalıq yanacaqların və istixana qazlarının emissiyasının aparıcı istehsalçısıdır, Azərbaycan isə Rusiya qazı əvəzinə Avropaya qaz tədarükünə kömək edir. Geosiyasi gərginliyin artdığı bir vaxtda iqlimlə bağlı diplomatik razılaşmanın əldə edilməsinin həmişəkindən daha çətin olacağı gözlənilir", – məqalədə deyilir.

Mövzu ilə bağlı Sonxeber.az – a açıqlama verən politoloq Asif Nərimanlı bildirib ki, bu yazının məqsədi COP29 öncəsi beynəlxalq ictimai rəyi Azərbaycanın əleyhinə çevirməyə çalışmaqdır:

"The Guardian"da dərc olunan yazı heç də real vəziyyəti izah etmək məqsədi daşımır. Bu yazının tamamını oxuduqda aydın olur ki, yazının məqsədi COP29 öncəsi beynəlxalq ictimai rəyi Azərbaycanın əleyhinə çevirməyə çalışmaqdır . Bunu da sırf dünyadakı vəziyyət üzərindən etməyə çalışırlar. Yazıda Azərbaycanın dünyanı sülhə çağırmağının səmimi olmadığını qeyd edirlər. Burda aydın görünür ki, bu məqalənin ardında erməni lobbisi var. Nəzərə almaq lazımdır ki, "The Guardian" bu vaxta qədər bir çox mövzularda ermənilərin maraqlarından çıxış edib. Bu baxımdan belə bir iddianın ortaya atılması dünyanı COP29 -dakı beynəlxalq razılaşmadan imtinaya çağırmaq məqsədi daşıyır. Bu, COP29 ərəfəsində Azərbaycana qarşı başlanmış kampaniyanın tərkib hissəsidir".

Bəs dünyadakı müharibə vəziyyəti COP29 – a təsir edəcək ?

"Biz ümumi vəziyyətə baxdıqda təbii ki, bəzi çətinlikləri görürük. Amma Azərbaycanın təcrübəsini nəzərə almalıyıq. İndiyə qədər Azərbaycan qlobal məsələlərdə bir çox böhran həll etməyə təşəbbüs göstərən bir ölkə olaraq çıxış edib. Bunu biz pandemiya dövründə beynəlxalq müstəvidə həmrəyliyə nail olmaq məsələsində gördük. Azərbaycan ilk dəfə həm qərbdə həm şərqdə yerləşən qlobal gücləri birləşdirdi. İndi də COP29-u təşkil edən bir ölkə kimi Azərbaycan beynəlxalq vəziyyəti nəzərə alır. İlk öncə sülhün əldə edilməsi üçün maksimum dərəcədə çalışacaq və buna nail olacaq. Ola bilər ki, müharibə vəziyyətində olan ölkələrdə silahlar tam yerə qoyulmasın Amma bu dövr dünyada ümumi olaraq daha anlayışlı dövr olacaq. Hesab edirəm ki COP29 vaxtı bütün kampaniyalara baxmayaraq yekun razılaşma əldə olunacaq".

Qeyd edək ki, noyabrın 11-dən iki həftə ərzində paytaxtı Bakıda keçiriləcək COP29 sammitinə Azərbaycan sədrlik edir. Dünyanın müxtəlif ölkələrindən hökumət başçıları və 180-dən çox ölkənin təmsil olunacağı gözlənilir.

Çiçək Sadatova

Telegramda izləyin

instagramda izləyin