"Qərb Azərbaycan qazının Ermənistana verilməsində maraqlıdır" - AÇIQLAMA

"Vətəndaş Sazişi" fraksiyasından olan deputat, iqtisadi məsələlər üzrə daimi komissiyanın sədr müavini Babken Tunyanın Ermənistan parlamentində keçirilən brifinqdə səsləndirdiyi fikirlər müzakirələrə səbəb olub. O, bildirib ki, Bakının istəyi olarsa, Azərbaycandan qaz ala bilərik.

Bəs, Azərbaycan qazı Ermənistana verilə bilərmi?

Mövzu ilə bağlı Sonxeber.az-a danışan politoloq Asif Nərimanlı bildirib ki, Azərbaycanla Ermənistan arasında Azərbaycanın tələblərinə uyğun sülh müqaviləsi imzalanarsa, qazın Ermənistana verilməsii mümkün ola bilər:

"Ermənistanın Azərbaycandan neft alması aktual olan bir məsələdir. Bunu bir-neçə aspektdən dəyərləndirmək olar. Hazırda Ermənistanın əsas neft və qaz təchizatı Rusiyadan təmin edilir. Ermənistan hakimiyyətinin apardığı siyasətə nəzər yetirdikdə görürük ki, onlar artıq Rusiyadan qoparaq qərbə yönəlir. Ermənistan mənbələrini dəyişdirməyə çalışır. Bu prosesdə əsas mənbələrdən biri də Azərbaycandır. Qərb Azərbaycandan enerji resurslarının Ermənistana verilməsində maraqlıdır. Çünki Azərbaycandan Ermənistana qaz verilməsi üçün kəmərlərin çəkilməsinə ehtiyac olacaq. Bu kəmərlər vasitəsiylə də qaz Ermənistandan qərbə gedə bilər. Bunun üçün Azərbaycanla Ermənistan arasında Azərbaycanın tələblərinə uyğun sülh müqaviləsi imzalanmalıdır. Etimad mühiti yaradılmalıdır. Əgər bu proses düzgün şəkildə həyata keçirilərsə, o zaman Azərbaycan qazının Ermənistana verilməsi mümkün ola bilər"

Çiçək Sadatova

Telegramda izləyin

instagramda izləyin