"Ölkəmiz tarixin bütün sınaqlarından üzüağ çıxdığı kimi qərb dairələrini də lazımi şəkildə susdurmağı bacarır" - DEPUTAT

"Bugün Azərbaycan regionda siyasi güc mərkəzinə çevrilib. Dünyada baş verən geosiyasi oyunların, riyakar, ikiüzlü qərb siyasətinin öhdəsindən layiqincə gəlir və ölkəmiz müstəqilliyini özü qoruyub saxlayır, Ermənistan kimi regionda qarantlar axtarmır".

Bunu Sonxeber.az-a danışan deputat Pərvanə Vəliyeva bildirib.

Deputat qeyd edib ki, Vətən müharibəsi təkcə işğalçı üzərində qələbə deyildi, həm də, işğalçını həvəsləndirən bəzi siyasi liderlərin məğlubiyyəti idi:

"Bu, Ermənistanla bərabər qərb dairələrinin cənab Prezidentə şəxsi məğlubiyyəti idi. Qələbəmizi həzm edə bilməyən dövlətlərdən biri də sözsüz ki, öz ikili standartları, məntiqsiz və mənasız bəyanatlarla özünü biruzə verən ABŞ-dır. ABŞ Senatının 60 nümayəndəsinin Enteni Blinkenə müraciəti isə ABŞ-ın iç üzünü ifşa edən növbəti addım idi.

Məktubda qeyd olunduğu kimi - COP29 kimi mötəbər tədbir bir fürsət kimi istifadə edilib. İnsan hüquqları və demokratiyadan təzyiq vasitəsi kimi istifadə etməyə çalışan ABŞ öz ölkəsində insan hüquqlarının boğulan səsindən niyə danışmır?

ABŞ-ın siyasi məhbusu Culian Assanja illərlə qeyri-insani işgəncələr verilib. Azərbaycanı siyasi məhbuslarla bağlı ittiham edən ABŞ hökuməti özü söz və məlumat azadlığına hücum edərək jurnalist Julian Assanjı bir sıra absurd ittihamlarla onun həbsinə nail olub. İsveçdə həbs olunan Assanjın ABŞ-a ekstradisiya olunmasına çalışıb. Assanj 2012-2019-cu illər arasında Ekvador səfirliyində təcrid şəraitində yaşamaq məcburiyyətində qalıb. Onun fiziki və psixoloji sağlamlığına ciddi ziyan vurulub. Beynəlxalq hüquq müdafiəçiləri bu təcrid şəraitini qeyri-insani hesab edirlər və ona "psixoloji işgəncə" verilib. ABŞ, Assanjı "Casusluq Aktı" ilə ittiham edir və onu 175 ilədək həbs cəzası gözləyir. Bu cəza həddinin çox ağır olduğu və məxfi məlumatları ictimaiyyətə açıqlamaq üçün bu qədər sərt bir cəza verilməsinin ədalətsiz olduğu bildirilir. Bir çox insan haqları və jurnalistika təşkilatları bu ittihamların söz azadlığını boğmağa xidmət etdiyini bildirir. Bir çox beynəlxalq insan hüquqları təşkilatları, o cümlədən BMT-nin xüsusi məruzəçiləri, Julian Assanjın məruz qaldığı rəftarın qeyri-insani olduğunu və onun siyasi məqsədlərlə təqib edildiyini bildirirlər. BMT, Avropa Şurası Assanjı siyasi məhbus kimi tanıyır. İnsan hüquqlarını kobud şəkildə pozan və azad mətbuatı susduran ABŞ okeanın o tayında yerləşən ölkələrin daxili işinə qarışır, müharibə cinayətkarlarını, soyqırım törədənləri, etnik təmizləmə aparanları, insanlığa zidd olan əməllər törədən canilərin azad edilməsinə çağırışmı edir?"

Deputat vurğulayıb ki, Qarabağ məsələsi çoxdan həll edilib, bu məsələdə heç bir işə yaramayan, fəaliyyətsiz, korrupsioner Minsk qrupunun qalıqlarından biri olan ABŞ isə regionda qalmaq üçün ən çirkin iftiralara əl atır:

"Vətən Müharibəsindən sonra Paşinyan hesab etdi ki, Ermənistana yeni qarant qüvvə lazımdı və bu vaxta qədər Ermənistan hökumətinin həyata keçirdiyi siyasət artıq işləmir. Ona görə də regiondan qovulan Minsk Qrupunun üzvləri – Fransa və ABŞ-ı fərqli ampulada regiona qaytarmaq istəyir. Cənab Prezidentin vurğuladığı kimi, Azərbaycana heç kəs diktə edə bilməz. Biz nəyi, nə zaman, necə edəcəyimizi yaxşı bilirik. Azərbaycan xalqı öz siyasi liderinin ətrafında bir yumruq kimi birləşib və müzəffər rəhbərinə arxalanır. Ölkəmiz tarixin bütün sınaqlarından üzüağ çıxdığı kimi bu gün qərb dairələrini də lazımi şəkildə susdurmağı bacarır.

Biz, 7-ci çağırış Milli Məclisin 43 deputatı ilə birgə ölkəmizin Xarici İşlər Naziri Ceyhun Bayramova müraciət edib ABŞ-la ölkəmiz arasında münasibətləri yenidən nəzərdən keçirməyi xahiş etmişik. Dövlətimiz öz gücünə hər sahədə irəliləyiş əldə edə biləcək potensiala malikdir, bizim ABŞ-ın yardım və ya dəstəyinə ehtiyacımız yoxdur".

Telegramda izləyin