"Əminəm ki, ölkəmiz cənab prezident İlham Əliyevlə bundan sonra da böyük uğurlara imza atacaq" - Emil Əkbərov

Bu gün İlham Əliyevin 2003-cü ildə ilk dəfə Azərbaycan Prezidenti seçilməsi günüdür.

Bununla bağlı Sonxeber.az-a danışan "BİG Media" MMC-nin direktoru Emil Əkbərov qeyd edib ki, artıq cənab İlham Əliyevin ilk dəfə Azərbaycan Prezidenti seçilməsindən 21 il ötür:

"2003-cü il oktyabrın 15-də keçirilən Prezident seçkilərində seçicilərin 76 faizindən çoxu İlham Əliyevin lehinə səs verərək onu Azərbaycan Prezidenti seçdi. Böyük səs çoxluğu ilə cənab İlham Əliyevi prezident seçən xalqımız həm də ölkəmizin inkişafında yeni bir mərhələ başlatdı. Cənab prezident İlham Əliyev iyirmi bir illik fəaliyyəti dövründə xalqa verdiyi bütün vədlərini yerinə yetirib. 21 il ərzində ölkəmizin bütün sahələrdə sürətli inkişafına nail olunub. Vətəndaşlarımızın sosial vəziyyətinin yaxşılaşdırılması istiqamətində bütün addımlar atılmaqdadır. Ən önəmlisi isə dövlətimizin siyasi, iqtisadi imkanları genişləndirilib. Müasir Ordumuz yaradılıb və beynəlxalq arenadakı mövqelərimiz möhkəmləndirilib. Məhz cənab prezident İlham Əliyevin uğurlu xarici siyasəti nəticəsində bu gün regionda reallaşdırılan bütün beynəlxalq, irimiqyaslı layihələr Azərbaycanın iştirakı, onun milli maraqlarının nəzərə alınması ilə həyata keçirilir. Bu COP29-un Bakıda keçirilməsi və Laçın şəhərinin 2025-ci ildə MDB-nin mədəniyyət paytaxtı seçilməsi cənab prezident İlham Əliyevin uğurlu xarici siyasəti nəticəsidir".

Emil Əkbərov vurğulayıb ki, cənab prezident İlham Əliyevin bütün sahələrdə eləcə də hərbi quruculuq sahəsində apardığı uğurlu siyasət sayəsində ərazi bütövlüyümüzü və suverenliyimizi tam bərpa edildi:

"Təəssüf ki, Azərbaycan tarix boyu hər zaman torpaqlarının bir hissəsini itirmək məcburiyyətində qalıb. Amma Ali Baş Komandan İlham Əliyevlə biz həm ərazi bütövlüyümüzü, həm də suverenliyimizi tam bərpa edə bildik. Buna görə də düşünürəm ki, ölkəmizin müstəqilliyini və ərazi bütövlüyünü tam şəkildə qorumaq gücünə malik tək lider cənab İlham Əliyevdir. Əminəm ki, cənab prezident İlham Əliyevlə bizi daha böyük uğurlar və nailiyyətlər gözləyir".

Telegramda izləyin