Azərbaycanda işsiz oğlanların evlənməsinə qadağa qoyula bilərmi? - AÇIQLAMA

Ailə Məcəlləsinə görə, ər və arvad ailədə öz münasibətlərini qarşılıqlı yardım, hörmət hissi əsasında qurmalı, ailənin möhkəmləndirilməsi və rifahı üçün birgə fəaliyyət göstərməli, övladlarının inkişafı üçün əlverişli şərait yaratmalı və onların sağlamlığının qayğısına qalmalıdırlar. Son illər ölkəmizdə boşanmaların sayı əvvəlki illərə nisbətən xeyli artıb. Bəs görəsən boşanmaların sayının artmasının səbəbi nədir?

Mövzu ilə bağlı Sonxeber.az – a açıqlama verən sosioloq Üzeyir Şəfiyev bildirib ki, boşanmaların müxtəlif səbəbləri var:

"Azərbaycanda son bir neçə ildir qlobal miqyasda olduğu kimi boşanmalar statistikasında da artım müşahidə olunur. Boşanmaların müxtəlif səbəbləri var. Azərbaycan uzun müddət ənənəvi xalq cəmiyyət olub. Bu cəmiyyətlərdə əsasən qayda və normaları onların özləri qoyur,tənzimləyir. Azərbaycan həm SSRİ -yə qədərki dövrdə, həm də SSRİ dövründə məhz belə ənənəvi qaydalarla yaşayıb. Həmin dövrlərdə boşanmalara bir ailə dramı, faciə kimi baxılıb. Amma SSRİ dağıldıqdan sonra Azərbaycan qlobal dünyaya inteqrasiya etdi və başqa ölkələrdəki həyat tərzləri ilə tanış oldu. İnsanlar gördülər ki, başqa ölkələrdə də boşanma halları var və heç kəs bunu dram kimi qəbul etmir. Azərbaycan kişisi də, qadını da boşanmaya fərqli yanaşmağa başladı. Onu faciəyə çevirmədilər".

Bəzi qadınlar bir- iki uşaq dünyaya gətirdikdən sonra boşanıb öz eqoist həyatlarını yaşamağa can atırlar:

"Qadınlar əvvəl daha çox evdar idilər. İndi isə onlar iqtisadi fəal kütləyə çevriliblər. Bu fəallaşmadan sonra əvvəlki qaydalarla yaşamaq istəmirlər. Kişilərin patriarxal təfəkkürlü köhnə sterotiplərinə, kaprizlərinə dözmək istəmirlər. Eqoist bir həyat tərzi yaşamaq istəyirlər. Hətta bəzən bəzi qadınlar bir- iki uşaq qazandıqdan sonra boşanıb öz eqoist həyatlarını yaşamağa can atırlar. Yəni dediyim kimi boşanmaların müxtəlif səbəbləri var. Kimisi xarakterlərin uyarsızlığını əsas gətirir, kimisi uşaqlarının olmamasını. Bəzən müxtəlif məişət zorakılığı fonunda da baş verir boşanmalar. Bəzənsə dolanışıq şəraitləri buna səbəb olur. Eyni zamanda biz bəzən saxta boşanma hallarının da şahidi oluruq. Məsələn bir qadın xarici vətəndaşlıq almaq üçün həmin ölkənin vətəndaşı ilə saxta nikaha girir sonra isə boşanır. Bu da boşanmalar statistikasına daxil olur".

Maddi problemlər səbəbindən baş verən boşanmaların sayının azalması üçün işsiz oğlanların evlənməsinə qadağa qoyula bilərmi?

"İşsiz oğlanların evlənməsinin qadağa edilməsi fikri ilə razı deyiləm. Bu humanist və rasional bir düşüncə deyil. Biz insanların qərarlarına bu şəkildə müdaxilə edə bilmərik. Hər kəsin ailə qurmaq, öz həyatını planlamaq kimi seçimi var. Biz gənc ailələrin məişət şəraitinin yaxşılaşması üçün çalışmalıyıq. Bu istiqamədə sosial dəstək proqramları yaradılmalıdır. Düzdür, ölkəmizdə gənc ailələrin güzəştli şərtlərlə mənzil əldə etməsi kimi bir proqram var. Hesab edirəm ki, bu proqram öz əhatə dairəsini biraz da genişləndirə bilər. Qardaş Türkiyədə gənc ailələrə dəstək fondu var. Bu fondda gənc ailələrə faizsiz kreditlər verilir və onlar 4 ildən sonra güzəştli şərtlərlə krediti ödəməyə başlayırlar. Oxşar layihələr ölkəmizdə də tətbiq oluna bilər".

Çiçək Sadatova

Telegramda izləyin