Bakıda COP29-da iştirak edən məşhur ingilis aktyor Teo Ceyms kimdir?

Məşhur ingilis aktyor Teo Ceyms hazırda Bakının qonağıdır. BMT-nin Qaçqınlar üzrə Ali Komissarlığının xoşməramlı səfiri olan aktyor COP29-da iştirak etmək üçün paytaxtdadır. O BMT-nin Qaçqınlar üzrə Ali Komissarlığının (UNHCR) "İqlim fəaliyyəti üçün qaçqınlar" şəbəkəsinin təqdimat mərasimində iştirak edib.

Bakıya gələn Teo sakinlərin marağına səbəb olub. Bir çox sosial platformaların Azərbaycan seqmentində onun video və fotoları paylaşılıb. Bu da öz növbəsində aktyorun şəxsi həyatı və karyerası ilə bağlı məlumatları gündəmə gətirib.

BAKU.WS COP29-a görə Bakıya təşrif buyuran Teo Ceyms haqqında bəzi faktları təqdim edir:

Əsl adı Teo Taptiklis olan Teo Ceyms 1984-cü il dekabrın 6-da İngiltərənin "High Wycombe" qəsəbəsində doğulub.

Onun anası Ceyn Martin Milli Səhiyyə Xidmətində çalışıb. Atsı isə Flip Aptiklis isə biznes məsləhətçi işləyib.

Teonun özündən böyük iki qardaşı və iki bacısı var. Onun atasının babası yunan olub.

Teo "Aylesbury Gramer" məktəbini bitirdikdən sonra Nottingham universitetinin məzunu olub. Aktyor burada fəlsəfə üzrə Ali təhsil alıb.

Ceyms həmçinin 2012-ci ildə dağılan Londonda yerləşən "Shere Khan" qrupunun müğənnisi və gitaraçısı idi.

Aktyor 2014-cü ildə "Divergent" adlı ekran işində çəkilib. Teo orada Şeylin Vudli və Keyt Uinslet kimi aktrisalarla tərəf müqabili olub.

Teonun rol aldığı ekran işləri arasında "Golden Boy", "Underworld : Awakening", "You Will Meet A Tall Dark Stranger", "The Inbetweeners Movie" "Archive", "The Monkey", "The Secret Scripture", "Lying and Stealing" kimi filmlər də var.

Ceyms "A Passionate Woman", "Downton Abbey", "Golden Boy", "The Gentlemen", "X-Men "97", "Sanditon", "Case Sensitive" kimi seriallarda da müxtəlif rolları canlandırıb.

O irlandiyalı aktrisa Rut Kerni ilə evlidir. Onların iki övladı var.

Aktyor ailəsi ilə vaxtını Kaliforniyada və Londonda keçirir.

O 2015-ci ildə "Hugo Boss" adlı ətir brendinin reklam çarxlarında çəkilməyə başlayıb. Hətta brendin əsas simasıdır.

Aktyor 2016-cı ilin iyun ayında Ceyms Birləşmiş Millətlər Təşkilatının Qaçqınlar üzrə Ali Komissarlığı ilə birlikdə Yunanıstana səfər etdi və burada suriyalı qaçqınlarla görüşdü və onların vəziyyəti haqqında daha çox öyrəndi.

O, bundan sonra qaçqınların hüquqlarının müdafiəçisi olub və Suriyada vətəndaş müharibəsi nəticəsində didərgin düşmüş insanlara humanitar yardım göstərilməsinə dair çağırışlar edib.

Telegramda izləyin