"Rusiyada yeni miqrasiya qaydaları müəyyənləşdi"-DEPUTAT

"Rusiya hökuməti miqrasiya sahəsində çox ciddi islahatlar həyata keçirir. Bu islahatlar miqrasiyanın tənzimlənməsi ilə bağlı mövcud qaydaları yenidən nəzərdən keçirilməsi və yenilərinin tətbiq edilməsi ilə bağlıdır. Rusiya hökuməti ərazisində çoxsaylı qanunsuz miqrant yaşayır. Hüquqi statusu bəlli olmayan kifayət qədər əcnəbi mövcuddur. Bu, əcnəbilərin qanunların liberal olmasından sui-istifadə etmələrinin qarşısının alınması üçün müəyyən edilib".

Bunu Sonxeber.az-a açıqlamasında Mİlli Məslisin deputatı Azər Allahverənov bildirib.

O, qeyd edib ki,baş verən terror hadisələrindən sonra hökumət miqrasiya siyasətini ayrı-ayrı seqmentləri üzrə yeni və sərt qaydalar tətbiq etməyə başladı. Bu proses ümumilikdə mart ayından bu yana davam edir. Yanvar ayından isə hökumət yeni qaydalar müəyyənləşdirəcək.
Burada bir neçə komponentlər üzrə məsələlər müşahidə edilir. Onların arasında xüsusilə 2 element gözə çarpır.
Köhnə qaydalarda miqrantlar 180 gün ölkə ərazisində qalmaq hüququna malik idi. Yeni qaydalarda isə bu hal 90 günə endirilib:

"Azərbaycan Respublikasından şəxsi məqsədlə Rusiyaya səfər edən şəxs bir qayda olaraq miqrant kartını doldurmalı, miqrasiya uçotuna düşməli və yalnız 90 gün ərzində Rusiya ərazisində yaşamalıdır. 91-ci gün artıq o, şəxs Rusiya ərazisini tərk etməlidir. Bundan sonra isə bu ölkəyə 1 il sonra qayıda bilər.
Əcnəbi miqrantın Rusiya ərazisində qalması üçün bir sıra əsaslar var. Onların arasında geniş yayılanı şəxsin bu ölkə ərazisində işləməsi üçün əmək müqaviləsinin və ya əmək patentinin olması, mülkiyyətində evin olması və ya qaldığı yerin icarədarı ilə müqaviləsinin mövcudluğu, təhsil alması ilə bağlı olan müddəalardır. Yalnız bu şəkildə müvəqqəti olaraq yaşamaq hüququ əldə edə bilər. Rusiya hökuməti maraqlıdır ki, onun ərazisində yaşayan miqrantların dövlət üçün potensial faydası olan, onlar ölkə iqtisadiyyatına gəlir gətirən şəxslər olsunlar.
Yanvarın 1-dən etibarən Rusiya ərazisinə daxil olan miqrantlar 7 gün ərzində miqrasiya uçotuna alınmalıdırlar. Əgər 7 gün ərzində qeydiyyata düşmürsə şəxs inzibatı xəta törətmiş sayılır.
Bu da təbii ki, miqrantlara müəyyən narahatlıqlar yaratmış olacaq. Əlavə proseduralardan keçmədə, perspektiv planların tutulmasında çətinliklər yaranacaqdır.
Beynəlxalq münasibətlər sistemində qarşılıq prinsip mövcuddur. Qarşı tərəf hansı qaydaları tətbiq edirsə, digər dövlət də həmin ölkənin vətəndaşlarına o qaydaları tətbiq etmək hüququna malikdir. Məsələn, 2015-ci ilin may ayından etibarən Rusiya vətəndaşı olmaq istəyən şəxs mənsub olduğu ölkənin vətəndaşlığından çıxması haqqında sənəd təqdim etməli idi. Təbii ki, bu qayda Azərbaycan vətəndaşlarına da şamil edildi. Ölkəmizdə də paritet və qarşılılıq prinsiplərindən irəli gələrək buna bənzər qaydalar tətbiq etdik. Azərbaycan vətəndaşlığını qəbul etmək istəyən Rusiya vətəndaşları bu ölkənin vətəndaşlığından çıxmalı oldular.
Rusiyada miqrasiya sahəsində tətbiq ediləcək yeni qaydalar Azərbaycanda da miqrasiya qanunvericiliyinin müvafiq müddəalarının nəzərdən keçirilməsini və bu əsasda mövcud qaydaların yenilənməsini mümkün edir ki, burada da paritet və qarşılılıq məsələləri əldə tutulan əsas prinsiplərdir".

Telegramda izləyin