Fransa destruktiv mahiyyətini və siyasətini ortaya qoyur - POLİTOLOQ

"Yeni il başlayar-başlamaz, biz, Azərbaycan-Ermənistan sərhəddində düşmən ölkənin silahlı qüvvələri tərəfindən mövqeylərimizin atəşə tutulduğunun şahidi oluruq. Bu hal regionda gərginliyin artmasına xidmət edir. Eyni zamanda nəzərə almaq lazımdır ki, 2025-ci ilin siyasi və geosiyasi proqnozları sırasında bir sıra beyin mərkəzləri, ayrı-ayrı coğrafiyalarda müharibə ehtimallarını da bölüşüblər".

Bunu Sonxeber.az-a politoloq İlyas Hüseynov danışıb.

O, açıqlamasında qeyd edib ki, Fransa Azərbaycan və Ermənistan arasında sülh istəməyənlər sırasında birinci yerdədir:

"Burad da Azərbaycan və Ermənistan arasında sülhün olma ehtimalını əsas gətirərək müharibənin olmayacağı fikirləri yer alır. Bu əlbəttə ki, müsbət bir yanaşmadır. Lakin, belə görünür ki, regionda dayanıqlı sülh və təhlükəsizlik əlehinə fəaliyyət göstərən qüvvələr də hərəkətə keçirlər. Sülhü istəməyən güc mərkəzləri arasında Fransa birinci yerdə dayanır. Fransa lideri Emmanuel Makronun revanşizmin gücləndirilməsinə xidmət edən bəyanatı hiddət doğurur. Çünki, burada, əsassız və haksız fikirlər söylənilir. Azərbaycan yersiz yerə ittiham olunur. Fransa özü Ermənistanı silahlandırmaqla, Cənubi Qafqaza müdaxilə etməsi fonunda Azərbaycanın dənizaşırı ərazilərə, Yeni Kalidoniyaya müdaxilə etdiyini bildirib. Bu da, əlbəttə ki, heç bir məntiqə sığmır. Eyni zamanda qeyd etmək lazımdır ki, Fransanın Ermənistanı sürətlə silahlandırması regionda gərginliyə yol açır və bu sülhə, sabitliyə xidmət etmir. Beləliklə, Fransa destruktiv mahiyyətini və siyasətini ortaya qoyur".

Vüsalə İbrahimli

Telegramda izləyin