"Avropa Şurası Parlament Assambleyası qərbin ən qəbuledilməz və təhlükəli qurumlarından biridir" - AÇIQLAMA

Gürcüstan nümayəndə heyətinin üzvləri səlahiyyətlərinə xitam verilməsi ilə bağlı Avropa Şurası Parlament Assambleyasının (AŞPA) sədrinə fərdi qaydada müraciət ediblər. Bu barədə "Sputnik Gürcüstan" "Telegram" kanalı məlumat verib.

Gürcüstan parlamentinin spikeri Şalva Papuaşvili məsələ ilə bağlı fikrini bildirib:

"Biz AŞPA-nın öz başlıca dəyərlərinə qayıtmasını gözləyirik, hansı ki, demokratiya və suverenliyə hörmət üzərində qurulub", - deyə o qeyd edib.

Politoloq Tural Ismayılov məsələni Sonxeber.az - a şərh edib:

"Avropa Şurası Parlament Assambleyası qərbin ən qəbuledilməz və təhlükəli qurumlarından biridir. Bütövlükdə burda heç bir siyasi etiket normalarına əməl edilmir. AŞPA-nın prinsip və dəyərləri deyə bir anlayışdan söhbət belə gedə bilməz. Avropa Şurası Parlament Assambleyası bu gün Frank Şuvabe başda olmaq üzrə üzlərinə siyasətçi maskası taxmış tamaşaların yaradıcılarının əlində oyuncağına çevrilmiş bir qurumdur. Təsəvvürə belə gəlmir ki, bir siyasi təşkilat necə hər hansı ölkəyə yenidən seçkilərin keçirilməsi ilə bağlı göstəriş verə bilər. Ümumilikdə AŞPA-nın Gürcüstana yenidən parlament seçkilərinin keçirilməsi ilə bağlı etdiyi təzyiqlər bir daha onu göstərir ki, AŞPA və bu qəbildən olan qurumlar ağıl və məntiqini tamamilə itirib. Gürcü xalqının ictimai rəyini, seçkilərdə xalqın səsini nəzərə almayan AŞPA-nın bu gün Gürcüstana seçki üzərindən təzyiq etməyə cəhd göstərməsi bu təşkikatın absurdluğunu növbəti dəfə nümayiş etdirmiş olur. Bu baxımdan da, Gürcüstan çox haqlı bir qərar verərək AŞPA-da təmsil olunmaqdan imtina edir. Biz bu ölkənin AŞPA-ya üzv olduğu zamanlarda da hər hansı müsbət dəyişiklik görməmişik. Əksinə bu gün AŞPA Gürcütsan üzərindən qəribə addımlar ataraq, ənənəvi imperealist dairələrin saxtakar oyunlarını davam etdirməyə çalışır. Bunlar birmənalı olaraq qəbuledilməzdir. Gürcüstan hakimiyyəti buna uyğun çox adekvat addımlar atır deyə düşünürəm".

Xatırladaq ki, ötən həftə ölkədə yeni parlament seçkisinin keçirilməsi ilə bağlı qətnamənin qəbulundan sonra Gürcüstan AŞPA-da fəaliyyətini dayandırıb.

Telegramda izləyin