"Rəsmi İrəvan özünün törətdiyi cinayətləri görməzdən gəlir" - Günay Ağamalı

"Ermənistanın Xarici İşlər naziri Ararat Mirzoyanın BMT-nin İnsan Hüquqları Şurasının 56-cı Sessiyasındakı çıxışı, bir daha Ermənistan hökumətinin bölgədə sülh və ədalətə maraqlı olmadığını göstərdi. O, Azərbaycanda məhkəməsi davam edən müharibə cinayətkarlarını müdafiə edərək, insan hüquqları anlayışına zidd fikirlər səsləndirməklə hüquqi prinsiplərə həmçinin, regionda sülh cəhdlərinə ciddi maneə yaradır".

Bunu Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında bildirib ki, Ermənistanın üzərinə götürdüyü öhdəlikləri yerinə yetirməməsi, onun sülhə deyil, yeni qarşıdurmalara hazırlaşdığının göstəricisidir:

"Rəsmi İrəvan özünün törətdiyi cinayətləri görməzdən gələrək, Azərbaycandan köçmüş ermənilərin məsələsini qaldıraraq siyasi riyakarlıq nümunəsi sərgiləməkdən əl çəkmir. İnsan hüquqları anlayışı Ermənistan hökuməti üçün önəmlidirsə o zaman ilk növbədə öz dədə-baba torpaqlarından deportasiya etdiyi yüz minlərlə azərbaycanlının geri qayıdışına şərait yaratmalıdır.

1991-ci il Almatı Bəyannaməsinə tez-tez istinad edən Ermənistan, həmin sənədi imzaladıqdan sonra Azərbaycana qarşı işğalçı siyasətini genişləndirib, 20 faiz torpaqlarımızı zəbt edib və 800 minə yaxın azərbaycanlını etnik təmizləməyə məruz qoyub. Rəsmi İrəvan dərk etməlidir ki, sülh anlayışı təkcə bəyanatlarda deyil, real addımlarla əldə olunur.

Ermənistanın regionda sürətlə silahlanması, üzərinə götürdüyü öhdəlikləri yerinə yetirməməsi, onun sülhə deyil, yeni qarşıdurmalara hazırlaşdığının göstəricisidir. Ermənistan hökumətindən tələbimiz odur ki, qeyri-konstruktiv siyasətindən üz döndərərək, öz əzəli yurdlarından zorla qovulmuş azərbaycanlıların təhlükəsiz və ləyaqətli şəkildə geri qayıdışına imkan yaratsın.

Davamlı sülh ədalət və hüquqların təmin edilməsi yolu ilə mümkündür. Ermənistan hökuməti bu çağırışlara cavab verməli, beynəlxalq hüquq qarşısında öhdəliklərini yerinə yetirməlidir".

Telegramda izləyin