Ramiz Mehdiyevin qızının uduzduğu məhkəmə işi: "Görünür, heç kimə qismət olmayacaq"

Prezident Administrasiyasının sabiq rəhbəri Ramiz Mehdiyevin qızı Kamilə Əliyevanın "Baku Oksford Məktəbi"nin müsadirəsi ilə bağlı verdiyi şikayət üzrə Bakı Apellyasiya Məhkəməsinin yekun qərarı açıqlandıqdan sonra həmin məktəbin qurucularından biri Nailə Rzayeva məsələyə münasibət bildirib.

Oxu.Az-ın məlumatına görə, N.Rzayeva sosial şəbəkə hesabında paylaşım edərək məktəbin müsadirə olunmasına ümid etdiyini bildirib:
"Mənim və mərhum həyat yoldaşım Tofiq Rzayevin təsisinə və inkişafına 26 il sərf etdiyi, həyasızcasına mənimsənilmiş "Baku Oxford School", görünür, heç kimə qismət olmayacaq. Çox ümid edirəm ki, dövlətimiz qanunsuz mənimsənilmiş məktəbi müsadirə edəcək. Təhsillə mütəxəssislər məşğul olmalıdırlar".

12:06

Prezident Administrasiyasının sabiq rəhbəri Ramiz Mehdiyevin qızı Kamilə Əliyevanın "Baku Oksford Məktəbi"nin müsadirəsi ilə bağlı verdiyi şikayət üzrə yekun qərar açıqlanıb.

Sonxeber.az "Qafqazinfo"ya istinadən xəbər verir ki, Bakı Apellyasiya Məhkəməsi Kamilə Əliyevanın şikayətini əsassız sayıb.

Hakim Faiq Qəniyevin sədrlik etdiyi məhkəmə heyəti təsdiq edib ki, məktəb "Baku Steel Company"dən mənimsənilən pullar hesabına inşa olunub. Bu səbəbdən nə Kamilə Əliyeva, nə də məktəbin təsisçisi Mehriban Məmmədova əmlak üzərində mülkiyyət hüququna malikdir.

Xatırladaq ki, "Baku Steel Company"nin keçmiş rəhbəri Rasim Məmmədov Dövlət Təhlükəsizliyi Xidməti (DTX) tərəfindən həbs edilib. Ona xüsusilə külli miqdarda mənimsəmə ittihamı ilə 13 il 9 ay həbs cəzası verilib.

Məmmədovun milyonlarla manat dəyərində əmlakı, o cümlədən "Baku Oksford Məktəbi" də müsadirə olunub. Kamilə Əliyeva məktəb binasının yarısının pay sahibi olduğunu iddia edir.

Məktəb bir müddət əvvəl 18 milyon 527 min 250 manata hərraca çıxarılmışdı.

Telegramda izləyin