"Gələn ilin əvvəlində Azərbaycanla Macarıstan arasında daha bir əhəmiyyətli enerji müqaviləsinin imzalanması gözlənilir" - DEPUTAT

"2025-ci il mayın 20-də Azərbaycan Respublikasının Prezidenti İlham Əliyev Macarıstana işgüzar səfəri çərçivəsində Baş nazir Viktor Orbanla görüş keçirib və birgə mətbuat konfransında çıxış edib. Bu görüş iki ölkə arasında strateji tərəfdaşlığın daha da dərinləşdiyini və qarşılıqlı etimada əsaslandığını bir daha nümayiş etdirdi.
Prezident İlham Əliyev çıxışında Azərbaycan–Macarıstan münasibətlərinin uğurla inkişaf etdiyini və iki ölkənin dost və strateji tərəfdaş olduğunu vurğulayıb. O, bildirib ki, bu münasibətlər qarşılıqlı dəstək, etimad və dostluq prinsiplərinə əsaslanır və bu, gələcək əməkdaşlıq üçün möhkəm təməl yaradır. Baş nazir Viktor Orban isə qeyd edib ki, Prezident İlham Əliyev Macarıstanın çətin dövrlərində hər zaman ölkəsinin yanında olub. O, Azərbaycanın enerji sahəsində Avropanın etibarlı tərəfdaşı olduğunu və bu əməkdaşlığın daha da genişləndirilməsinin vacibliyini qeyd edib".

Bu sözləri Sonxeber.az-a Milli Məclisin deputatı Şahin Seyidzadə danışıb.

O, açıqlamasında qeyd edib ki, Azərbaycan ilə Macarıstan arasında strateji əməkdaşlıq son illərdə daha da dərinləşib və bu əlaqələr enerji sahəsində xüsusi dinamika qazanıb:

"Prezident İlham Əliyev bildirib ki: "Macarıstanı bütün əldə edilmiş uğurlar münasibətilə təbrik etmək istəyirəm. Biz bilirik ki, Macarıstan müstəqil siyasət aparan nadir ölkələrdən biridir. Xüsusilə Avropa İttifaqı çərçivəsində müstəqil siyasət aparmaq kifayət qədər çətindir. Çünki bir çox qaydalar, oturuşmuş prinsiplər var və Avropa İttifaqının vahid xarici siyasəti təbii olaraq prinsiplərdən biridir. Buna baxmayaraq, dostum Viktor Orban həmişə Macarıstanın dövlət və milli maraqlarını hər şeydən üstün tutub. Biz bunu alqışlayırıq".
Azərbaycan ilə Macarıstan arasında strateji əməkdaşlıq son illərdə daha da dərinləşib və bu əlaqələr enerji sahəsində xüsusi dinamika qazanıb. Hazırda Macarıstan şirkətləri Azərbaycanın əsas enerji layihələrindən olan "Azəri-Çıraq-Günəşli" və "Şahdəniz" yataqlarında pay sahibidir. Bu, Macarıstanın regionumuzda artan iqtisadi fəallığını və Azərbaycanın xarici tərəfdaşlara olan etibarını bir daha təsdiqləyir. Gələn ilin əvvəlində Azərbaycanla Macarıstan arasında daha bir əhəmiyyətli enerji müqaviləsinin imzalanması gözlənilir. Bu kontrakt əsasında Macarıstan şirkəti artıq Azərbaycanın quruda yerləşən neft yataqlarında da fəaliyyətə başlayacaq. Bu əməkdaşlıq təkcə enerji sahəsində deyil, ümumilikdə iqtisadi əlaqələrin genişlənməsi baxımından da vacib əhəmiyyət daşıyır. Ölkəmiz artıq bir müddətdir ki, Macarıstana təbii qaz ixrac edir. Azərbaycanın qaz ixrac imkanları kifayət qədər genişdir və artmaqda davam edir".

Deputat onu da vurğuladı ki, bu gün biz 12 ölkəyə təbii qaz ixrac edirik, onların 10-u Avropa ölkəsidir və 8-i Avropa İttifaqının üzvüdür:

"Avropa Komissiyası Azərbaycanın Pan-Avropa qaz təchizatçısı və etibarlı tərəfdaş statusunu təsdiqləyib. Bu, ölkəmizin enerji təhlükəsizliyinə verdiyi töhfənin və regional mövqeyinin göstəricisidir. Bundan əlavə, yaşıl enerji sahəsində də Azərbaycan–Macarıstan əməkdaşlığı güclənməkdədir. Ölkəmizin qarşıdakı beş il üçün yaşıl enerji sahəsində konkret planları mövcuddur. Artıq 500 meqavat gücündə yaşıl enerji istehsal olunub, növbəti mərhələdə bu göstəricinin 6 min meqavata çatdırılması nəzərdə tutulur. Bu layihələr bizə ildə təqribən 3-4 milyard kubmetr qaza qənaət etmək imkanı verəcək və həmin resursların əsas ixrac istiqaməti Türkiyə və Avropa ölkələri olacaq.
Prezident İlham Əliyev verdiyi müsahibəsində vurğulamışdır ki, İkinci Qarabağ müharibəsinin bitməsi ilə Azərbaycan regionda uzunmüddətli sülhün və əməkdaşlığın qurulması üçün konkret və konstruktiv təkliflərlə çıxış edib. İkinci Qarabağ müharibəsindən sonra bölgədə dayanıqlı sülhün bərqərar olması istiqamətində atılan əsas addımların təşəbbüskarı məhz Azərbaycan olmuşdur. Dövlət başçısının sözlərinə görə, Bakı sülh gündəliyini irəli sürməklə, erməni tərəfinin revanşist niyyətlərdən əl çəkməsinə və beynəlxalq hüquq prinsiplərinə əsaslanan normal qonşuluq münasibətlərinin qurulmasına şərait yaratmaq istəyir.
Bu səfər Azərbaycan–Macarıstan münasibətlərinin yeni mərhələyə qədəm qoyduğunu və strateji tərəfdaşlığın daha da gücləndiyini göstərir. İki ölkə arasında qarşılıqlı hörmətə və etimada əsaslanan bu əməkdaşlıq, regional və qlobal səviyyədə sülhə və sabitliyə töhfə verəcəkdir".

Telegramda izləyin