"Fransanın Cənubi Qafqazda vasitəçilik iddiası obyektivlikdən yox, post-kolonial eqodan qaynaqlanır" - AÇIQLAMA

Fransa Azərbaycan və Ermənistan arasında sülh sazişinin imzalanmasını vacib hesab edir.

Sonxeber.az erməni KİV-lərinə istinadən xəbər verir ki, bunu Fransa xarici işlər naziri (XİN) Jan-Noel Barro İrəvanda keçirilən mətbuat konfransında bildirib.

Onun sözlərinə görə, Cənubi Qafqaz regionu Avropa üçün vacib kommunikasiya qovşağıdır.

"Bu baxımdan Bakı və İrəvan arasında sülh sazişinin imzalanmasını vacib hesab edirik", - XİN başçısı əlavə edib.

"Fransanın Cənubi Qafqazda vasitəçilik iddiası obyektivlikdən yox, post-kolonial eqodan qaynaqlanır"- bunu Sonxeber.az -a açıqlama verən politoloq Tural İsmayılov deyib:

"Fransanın Cənubi Qafqazda vasitəçilik iddiası obyektivlikdən yox, post-kolonial eqodan qaynaqlanır. Parisin Bakı ilə İrəvan arasında sülh çağırışları siyasi ikiüzlülüyün nümunəsidir. Ermənistanla hərbi əməkdaşlığını genişləndirən, onu silahlandıran bir ölkənin "sülh"dən danışması ziddiyyətlidir. Fransa açıq şəkildə regionda balansı pozmağa çalışır. Bu, ATƏT-in Minsk Qrupundakı köhnə, iflasa uğramış rolunun revanşını xatırladır. Ermənistan isə hələ də sülh dilindən yox, revanşist ritorikadan əl çəkməyib. Azərbaycanın ərazi bütövlüyünə qarşı yönəlmiş addımları dəstəkləyən istənilən ölkə sülh prosesinə töhfə yox, təxribat verir. Fransa unutmamalıdır ki, Cənubi Qafqaz Parisin Afrika təcrübəsini təkrarlaya biləcəyi yer deyil. Azərbaycan bölgədə suverenliyini bərpa etmiş bir dövlətdir və diktatları qəbul etmir. Ermənistan isə öz daxilində demokratik problemlər, siyasi xaos və hərbi revanşizm girdabında boğulur. Fransanın bu ölkəyə arxa durması regional sabitlik üçün təhlükədir. İrəvan hələ də öz qonşuları ilə münasibətləri normallaşdırmaq əvəzinə, xarici himayəyə bel bağlayır. Parisin erməni diasporasına bağlı siyasəti obyektiv deyil, siyasi borcun nəticəsidir. Fransa Avropa dəyərlərindən danışsa da, burada ikili standartlarla çıxış edir. Ermənistanın sülhə hazır olmaması bölgədəki əsas problem olaraq qalır. Bu ölkə hələ də 30 illik işğal tarixinin məsuliyyətini daşımaq istəmir. Fransa isə bu məsuliyyətsizliyi ört-basdır etməyə çalışır. Sülh real niyyətlərlə deyil, real addımlarla mümkündür – erməni silahlandırılması ilə yox".

Telegramda izləyin