"28 May xalqımızın tarixində müstəqillik və dövlətçilik ideallarına söykənən şanlı bir səhifədir" - DEPUTAT

"28 May xalqımızın tarixində müstəqillik və dövlətçilik ideallarına söykənən şanlı bir səhifədir. Azərbaycan Xalq Cümhuriyyətinin yaranması çoxəsirlik dövlətçilik ənənələrimizin davamı idi və bu dəyər bu gün də müasir Azərbaycan Respublikasının inkişaf yolunda əsas dayaq nöqtələrindən biridir".

Bu sözləri Sonxeber.az-a Milli Məclisin deputatı, Ana Vətən Partiyasının sədr müavini Günay Ağamalı danışıb.

O, açıqlamasında qeyd edib ki, bu əlamətdar günün gələcək nəsillərə daha dolğun və dəyərinə uyğun çatdırılması istiqamətində dövlətimiz tərəfindən ardıcıl olaraq bayram tədbirləri, konsertlər və AXC-nin demokratik prinsiplərindən bəhs edən elmi seminarlar təşkil olunur:

"Təbii ki, bu irsin daha əhatəli tədrisi və təbliği istiqamətində dövlətimizlə yanaşı gəncliyimizin də üzərinə böyük məsuliyyət düşür. Gənclər, onlar üçün vətənpərvərlik ruhunda tədbirlərin təşkilindən, medianın, sənədli filmlərin və rəqəmsal resursların imkanlarından geniş istifadə etməklə bu istiqamətdə atılan addımları daha mütəşəkkil şəkildə, geniş müstəvidə təqdim edə bilərlər. Bununla yanaşı diaspor təşkilatlarımız və onların gənc fəalları vasitəsilə Cumhuriyyətin zəngin mədəni irsinin dünyanın müxtəlif yerlərində təbliğ etdirilməsi müstəsna əhəmiyyət kəsb edir.

Müstəqillik Günü yalnız keçmişin deyil, həm də gələcəyin təməlidir. Bu mirasın yaşadılması, qorunması hər dövlətimizin daim diqqət mərkəzindədir və bizlərdə bu uğurda öz üzərimizə düşən bütün vəzifələri layiqincə yerinə yetirməliyik".

Vüsalə İbrahimli

Telegramda izləyin