Hindistanda sərnişin təyyarəsi tibb fakültəsinin yeməkxanasına düşdü: Çox sayda ölən var

Hindistanın Ahmedabad şəhərində yerləşən Sardar Vallabhbhai Patel Beynəlxalq Hava Limanından Londondakı Gatwick Hava Limanına yola düşən sərnişin təyyarəsi havaya qalxdıqdan cəmi bir dəqiqə sonra yaşayış məntəqəsinə düşüb.

Sonxeber.az xəbər verir ki, Hindistan mediasında yayılan xəbərlərə əsasən, "Air India 171" reysi ilə uçan təyyarədə neçə sərnişinin olduğu barədə rəqəmlər fərqli göstərilir.

Lakin India Today nəşri təyyarədə 230 sərnişin və 12 heyət üzvü olmaqla ümumilikdə 242 nəfərin olduğunu bildirib. Qəza baş verən təyyarədə 169 Hindistan, 53 Böyük Britaniya, 7 Portuqaliya və 1 Kanada vətəndaşının olduğu qeyd olunub.

Hindistan polisi təyyarənin həkimlərin məskunlaşdığı yataqxana binasına çırpıldığını açıqlayıb. Məlumata görə, təyyarə Ahmedabad şəhərinin Meghani Nagar bölgəsində yerləşən BJ Tibb Fakültəsinin stajyor həkim və tələbələrinin qaldığı pansiyonun yeməkxanasına düşüb. Qəza zamanı yeməkxanada 50-60 stajyor həkimin olduğu bildirilir.

Hadisənin səbəbi ilə bağlı hələlik rəsmi açıqlama verilməyib. Sosial mediada yayılan görüntülərdə hadisə yerindən qalxan qatı qara tüstü müşahidə olunub. Qəza anını əks etdirən videolarda təyyarənin sanki alov topuna çevrildiyi görünür.

Hadisə ilə əlaqədar hava limanı və ətraf yolların bağlandığı, əraziyə çox sayda təcili yardım briqadasının göndərildiyi bildirilir. Hadisə ilə bağlı araşdırma aparılır.

Telegramda izləyin