Azərbaycan quru sərhədlərini niyə bağlı saxlayır? - AÇIQLAMA

Azərbaycan ərazisində xüsusi karantin rejiminin müddəti uzadılıb.

Bu barədə Baş nazir Əli Əsədov müvafiq qərar imzalayıb.

Qərarla koronavirus (COVID-19) infeksiyasının ölkə ərazisində yayılmasının, onun törədə biləcəyi fəsadların qarşısının alınması məqsədilə Azərbaycan ərazisində xüsusi karantin rejiminin müddəti 2025-ci il 1 oktyabr saat 06:00-dək uzadılıb. Bununla da quru sərhədlər bağlı qalmağa davam edəcək.

Azərbaycan 2020-ci ildən bəri quru sərhədlərini bağlı saxlayır. Əvvəllər bu pandemiya şəraiti ilə əlaqələndirilirdi. Lakin zamanla səbəbin başqa olduğu barədə müzakirələr artdı. Bəs görəsən Azərbaycan niyə hələ də quru sərhədlərini bağlı saxlayır?

Mövzu ilə bağlı politoloq Tural İsmayılov Sonxeber.az -a açıqlama verib:

"Quru sərhədlərin bağlı qalması ölkəni kəşfiyyat sızıntıları, qeyri-qanuni fəaliyyətlər və mümkün terror təhlükələrindən qoruyur. Bu addım həmçinin hərbi təhdidlərin qarşısını almaqda önəmli rol oynayır. Sərhədlərin bağlı olması ölkədə daxili sabitliyi də gücləndirir. Digər tərəfdən, bağlı sərhədlər ticarət əlaqələrinə və regional əməkdaşlıq imkanlarına müəyyən məhdudiyyətlər gətirir. Bu da iqtisadi inkişafı yavaşıda bilər. İranla münasibətlərdə yaranan soyuqluq riski də nəzərə alınmalıdır. Lakin bütün bunlara rəğmən təhlükəsizlik prioritet olaraq qalır və dövlətin əsas vəzifəsidir. Azərbaycan uzunmüddətli perspektivdə sərhədlərin açılmasını arzulayır. Ancaq bu yalnız regionda stabillik və etimad mühiti formalaşdıqdan sonra mümkündür. Xarici siyasətdə sərhəd məsələsi həssasdır və strateji yanaşma tələb edir. Prezident İlham Əliyev sərhədlərin bağlı qalmasının zəruriliyini dəfələrlə vurğulayıb və bu mövqeyi qoruyur. Bu siyasət Azərbaycanın təhlükəsizliyini qorumaq üçün atılan vacib və realist addımdır. Dövlət təhlükəsizliyi bütün digər sahələrdən üstün tutulur. Eyni zamanda, Azərbaycan həm təhlükəsizliyi, həm də iqtisadi inkişafı balanslı şəkildə təmin etməyə çalışır. Quru sərhədlərin bağlı qalması ölkənin daxili və xarici siyasətinə təsir edir, amma hazırki şəraitdə bu, ən doğru seçimdir. Regiondakı gərginliklər azalana, təhlükəsizlik təmin ediləndə sərhədlərin açılması üçün şərait yarana bilər. Bu addım həm ölkənin inkişafına, həm də regional inteqrasiyaya təkan verər. Lakin indiki risklər fonunda ehtiyatlı olmaq zəruridir. Azərbaycanın milli maraqları və təhlükəsizlik strategiyası bundan sonra da prioritet olaraq qalacaq".

Telegramda izləyin