İki həftə əvvəl nişanlanmışdı – Gənc futbolçu faciəvi hadisə nəticəsində həyatını itirdi

Türkiyənin Sakarya vilayətinin Karasu rayonunda baş verən faciəvi hadisə gənc bir futbolçunun həyatına son qoyub.

Sonxeber.az xəbər verir ki, hadisə bu gün saat 15:30 radələrində Karasu rayonunun Yalı məhəlləsində yerləşən bir yaşayış kompleksinin hovuzunda baş verib.

İstirahət məqsədilə hovuza girən Alihan Güldal, suya tullanarkən boynunu sındırıb və hərəkətsiz halda sudan çıxarılıb. Ətrafdakıların məlumatı əsasında hadisə yerinə təcili tibbi yardım briqadası cəlb olunub.

Səhiyyə işçilərinin ilkin müayinəsi zamanı futbolçunun boynunun sındığı müəyyən edilib. Güldal əvvəlcə Karasu Dövlət Xəstəxanasına, daha sonra isə Sakarya Təhsil və Araşdırma Xəstəxanasına aparılıb. Həkimlərin bütün səylərinə baxmayaraq, gənc futbolçunun həyatını xilas etmək mümkün olmayıb.

Alihan Güldalın İstanbuldan gəldiyi, iki həftə əvvəl nişanlandığı bildirilir. Onun Türkiyənin 1-ci Amatör Liqasında çıxış edən Gümüşsuyu FK komandasında futbol oynadığı qeyd olunub.

Hadisə ilə bağlı hüquq-mühafizə orqanları tərəfindən araşdırma aparılır.

Telegramda izləyin