4 uşaq anası evində bıçaqlanaraq vəhşicəsinə qətlə yetirildi

Türkiyənin Eskişehir şəhərinin Tepebaşı rayonuna bağlı Güllük məhəlləsinin Havlucu küçəsində yerləşən 3 mərtəbəli binada dəhşətli qətl hadisəsi baş verib.

Sonxeber.az türk mediasına istinadən xəbər verir ki, hadisə gecə saatlarında baş verib və sakinlərin sözlərinə görə, qan donduracaq səhnələr yaşanıb.

Əldə edilən məlumata görə, 1-i əlil olmaqla 4 uşaq anası olan, əcnəbi vətəndaş Shabana Solaıman K., əlil övladı ilə yaşadığı evdə bıçaqlanaraq amansız şəkildə öldürülüb.

Hadisə yerinə çoxsaylı polis və təcili tibbi yardım qrupları cəlb olunub. Polis mənzilə daxil olduqda qadının cansız bədəni ilə qarşılaşıb. Mərhumun meyiti məhkəmə-tibbi ekspertiza üçün xəstəxanaya aparılıb.

Qətllə bağlı dərhal istintaq başladılıb və hadisə ilə əlaqədar 2 nəfər şübhəli şəxs saxlanılıb. Məlum olub ki, qadın 4 övladından yalnız əlil olan övladı ilə birlikdə həmin ünvanda yaşayırmış.

Eskişehir Ailə və Sosial Xidmətlər İdarəsi tərəfindən qadının bütün uşaqları qoruma altına alınıb. Qətlin motivi və digər təfərrüatlar istintaq çərçivəsində araşdırılır.

Telegramda izləyin